Карпин ва Арутюнянц Шомуродовни йилнинг энг яхши футболчиси деб топишмади

Бу ҳақида "Спорт-Экспресс" нашри хабар қилди.

Овоз бериш жараёнида жамоа президенти ўз ваколати доирасида 5 нафар футболчини танлаб кўрсатиши керак бўлган ва Арутюнянц барча футболчиларни ўз клубидан танлаган. У биринчи ўринга "Ростов" тўпурари Элдор Шомуродовни эмас, Роман Ерёменкони муносиб деб топгaн. Кейинги ўринларга Матиас Норманн, Ивелин Попов, Элдор Шомуродов, Алексей Ионовлар муносиб кўрилган.

Шунингдек, жамоа устози Валерий Карпин биринчи ўринга муносиб деб "Монако" ярим ҳимоячиси Александр Головинни кўрсатган. Мураббийнинг рўйхатида Элдор 5-ўринни банд қилган.

Кўпчилик ўқувчиларимиз ҳамюртимиз умумий сўровномада нечанчи ўринни эгаллагани билан қизиқдилар. Таъкидлаш лозимки, Элдор 4-ўринни эгаллаган. Ундан олдинда Артём Дзюба, Александр Головин ва Гжегож Криховяклар жойлашган.

Ушбу сўровнома қандай мезонлар асосида шакллантирилгани ва овоз бериш жараёни ҳақида бироздан кейин батафсил маълумот берамиз. Дарвоқе, Роман Ерёменко умумий натижаларга кўра 11-ўринни эгаллаган.

 Бироз аввал, "Спорт-Экспресс" нашри маълумотларига таяниб Россияда йилнинг энг яхши футболчиси аниқлангани ҳақида ҳам хабар бергандик.