Камолиддин Мурзоев: "Навбаҳор" янги футболчиларининг лицензиясини қайтариб олиниши ва очко олиб ташланиши мумкин"

Гап шундаки, клубнинг ўзбекистонлик футболчилар олдида қарздорлиги бор. Бу борада Ўзбекистон футболчилар уюшмаси раҳбари Камолиддин Мурзоев фикрларини билдирди. 

"Хабарингиз бор, қарздорлик билан боғлиқ муаммолар сабаб "Навбаҳор" жамоасига ёзги трансфер ойнаси шартли равишда очиб берилган эди.

Клуб эса 10 августгача тўлаш ҳақида кафолат берган ва тўланмаган тақдирда рўйхатдан ўтган янги футболчиларнинг лицензияси қайтариб олинишига эътироз билдирмасликларини айтишган.

Бугун футболчилар ўтиши ва мақоми қўмитасининг навбатдаги йиғилиши бўлиб ўтади. Унда "Навбаҳор" янги футболчиларининг лицензиялари қайтариб олиниб, кейинги чора сифатида очко олиб ташлаш масаласи кўтарилади",- дейди Камолиддин Мурзоев.

Маълумот учун, "Навбаҳор" бугун Суперлиганинг 18-турида "Бобур Арена"да "Андижон" меҳмони бўлади.