Жамшид Болтабоев: “Пахтакор–79” ҳар доим ёдимизда”

Худди шу куни “Пахтакор” жамоасининг йигитлари Украина осмонида самога сочилди. Биз ҳар йили 11 август санасини қайғу ва алам билан ёдга оламиз. Эртага ушбу йигитларимизнинг бу ёруғ оламдан кўз юмганига роппа – роса 37 йил бўлади. Ушбу қайғули кунни эслаб “Пахтакор” клубининг футболчиси Жамшид Болтабоев “Пахтакор – 79“ жамоасини бир зум ёдга олди.

-  Биз ҳар йили 11 август санаси куни бутун жамоа билан “Пахтакор” стадионида йиғилиб Боткин қабристонига бориб уларни эслаб қабрларига гуллар қўйиб зиёрат қиламиз. Ўша пайтда “Пахтакор” жамоаси жуда ҳам кучли бўлган. Киевнинг “Динамо”сига тўртта гол уриб мағлубиятга учратишган.

Агарда ўша мудҳиш воқеа бўлмаганида балки футболимиз бунданда ривожланган бўлармиди. Михаил Ан, Федеров, Олим Аширов мана шу футболчиларнинг ўйинларини катталардан эшитиб келганмиз. Менимча авлоддан – авлодга ўтиб келса керак. “Пахтакор – 79” жамоаси ҳар доим ёдимизда бўлади. Биз уларни ҳеч қачон унутмаймиз”, - дейди “Пахтакор” клуби футболчиси Жамшид Болтабоев.

Жаҳонгир Сотволдиев