Жаҳон чемпионатига йўл болалар футболидан бошланади

Шу йил бошида туман ҳокимлиги ташаббуси билан “Яшнобод” профессионал футбол клуби ташкил этилганди.

Айни пайтда яшнободликлар Тошкент шаҳар чемпионатида муваффақиятли қатнашаётган бўлса, ушбу футбол клуби қошида ташкил этилган тўртта ёш гуруҳларида 150 нафардан зиёд ёш “чарм тўп” ихлосмандлари ўз маҳоратларини оширишяпти. Уларнинг мунтазам футбол билан шуғулланишлари учун туман ҳокимлиги томонидан етарли шарт-шароитлар яратиб берилаётганли айниқса қувонарлидир.

— Туманимизда ҳозирда 57 маҳалла мавжуд, — дейди туман ҳокими Хожиакбар Тиллашайхов. — Уларда истиқомат қилаётган аҳолининг катта қисмини вояга етмаган болалар ва ўсмирлар ташкил этади. Мақсадимиз ана шу фарзандларимизнинг бўш вақтини мазмунли ўтказиш, уларни миллионлар ўйини — футболга жалб этиш ва шу орқали янги истеъдодларни кашф қилишдан иборат. Яхши ният билан туманимизда “Яшнобод” профессионал футбол клубига асос солинди. Ҳозирда уларнинг эришаётган натижалари ёмонмас. Айни шу клуб қошида ташкил этилган болалар футбол секцияларида юзлаб ёшлар маҳоратини оширишмоқда. Балки келажакда уларнинг ҳаммаси ҳам юлдуз бўлиб улғайишмас, аммо улар соғлом ва баркамол вояга етишишлари учун бу тўгараклар жуда асқотиши шубҳасиз. Қолаверса, ана шу ёш футболчилар орасидан кашф қилинган истеъдодли ёшлар келажакда Осиё ва жаҳон чемпионатларида мамлакатимиз шарафини ҳимоя қилишларига ишонамиз.

Шаҳар ва мамлакат миқёсидаги мусобақаларда иштирок этиб келаётган “Яшнобод” болалар футбол жамоаси яқинда Малайзиянинг Kejora U-15 Challenge 2018 халқаро турнирида қатнашиш учун таклифнома олди. Бундан хабар топган Яшнобод туман ҳокимлиги болалар футбол жамоасини қўллаб-қувватлаб, уларнинг дунёнинг йигирмадан ортиқ давлатлари ёш футболчилари қатнашадиган халқаро турнирда иштирокини таъминлаб беришга қарор қилди.

Кеча эрта тонгда Тошкент халқаро аэропортидан 14-15 ёшли футболчилардан иборат “Яшнобод” футбол жамоаси халқаро турнирда юртимиз шарафини ҳимоя қилиш учун Куала-Лумпурга жўнаб кетишди. Уларни ёш футболчиларнинг ота-оналари билан бир қаторда туман ҳокими Хожиакбар Тиллашайховнинг ўзи кузатиб қўйди ҳамда жамоа аъзоларига омад ва оқ йўл тилади.