Ислом Тўхтахўжаев: "Бизнинг ҳам орзуимиз – Жаҳон чемпионатига чиқиш"
02 окт 2016 14:05
Янгиликлар
![](https://championat.asia/upload/storage/222916_original.jpg)
![](/upload/storage/222916_220.jpg)
Ислом Тўхтахўжаев: "Бизнинг ҳам орзуимиз – Жаҳон чемпионатига чиқиш"
Бош жамоамиз 6 ҳамда 11 октябрь кунлари Тошкентда Жаҳон чемпионати-2018 сўнгги саралаш раунди доирасида дастлаб Эрон, сўнгра Хитой терма жамоаларига қарши баҳс юритади.
Ҳозирда Самвел Бабаян шогирдлари пойтахтимизда мазкур ўйинларга тайёргарлик олиб бормоқда. Йиғинга жами 25 нафар футболчи жалб этилган бўлиб, улардан тўрт нафари “Локомотив” аъзоларидир. “Локомотив” ва терма жамоамизнинг ишонган ҳимоячиларидан бири саналган Ислом Тўхтахўжаев олдинда турган муҳим учрашувлар олдидан клуб матбуот хизматига ўз фикрларини билдириб ўтди.
- Олдиндаги ўйинларга тайёргарлик жараёни яхши кетяпти. Дастлаб Эронга қарши ўйнаймиз. Бу рақибни ҳар томонлама ўрганяпмиз. Умуман олганда, терма жамоамизда руҳият яхши. Барча футболчилар бир мақсадни кўзлаган ҳолда машғулотларда иштирок этишяпти.
Шукрки, ҳал қилувчи босқични мағлубиятсиз бошладик. Энди шу ғалабали серияни давом эттиришимиз лозим бўлади. Аммо бу осон бўлмаслиги тайин. Зеро 3-босқичга оддий терма жамоалар етиб келгани йўқ. Шу боисдан ҳар бир учрашувга 100 фоизлик куч билан чиқиш керак бўлмоқда.
Агар шу олдинда турган икки ўйин – Эрон ва Хитой термаларига қарши баҳсларни ҳам ғалаба билан якунлай олсак, олдинга катта қадам ташлаган ва мақсадимиз томон анча яқинлашган бўламиз. Буни барчамиз жуда яхши тушуниб турибмиз.
Кўпсонли ишқибозларимизни ҳам, бизнинг ҳам орзуимиз – Жаҳон чемпионатига чиқиш. Агар ҳар бир ўйинда мухлисларимиз стадионга келиб, бизни қўллаб-қувватлаб туришса, биз албатта майдонда боримизни бериб ҳаракат қиламиз, - дейди маҳоратли ҳимоячи “Локо” расмий сайтига.
Таъкидлаб ўтиш жоизки, мундиал сари йўлга чиққан Ўзбекистон миллий терма жамоси дастлаб 6 октябрь куни Тошкентда Эрон терма жамоасига қарши, сўнгра 11 октябрда Хитой терма жамоасига қарши ўйин ўтказади.
Ўхшаш янгиликлар
![AMP Logo](https://championat.asia/image/logo-amp.png)
Фикрлар