Илёс Зейтуллавев: "Ислом Исмоиловнинг эмоционал интервьюсини кўрганман. Сўнгги ҳолатлар шу мавзуни яна ўйлаб кўриш кераклигини кўрсатяпти"

- Ўйин ҳақида

- Ўзбекистон Суперлигасида ишлашни бошлаганимдан буён ҳеч бир ўйин осон ўтаётгани йўқ. Аксарият мураббийлардан анчайин ёшман, фаолиятим давомида тажриба ҳам тўплаб боряпман. Эмоциялар, ҳаяжон ва ҳиссиётлар, стресслар футболнинг ажралмас қисми. "Бунёдкор" билан ишлаган даврим, ортда қолган йил, барчасида бугунги каби қийин ўйинларни ўтказдик, ютган ўйинларимизда, дуранг ёки мағлубиятда ҳам.

- Ҳакамлик ҳақида фикрингиз қандай? Масалан, "Бунёдкор"нинг ҳам иккинчи голи VAR томонидан бекор қилинди...

- Иккинчи голимизни бекор қилиниши ҳақида ҳакамлар изоҳ беришса керак. Қаерда ўйиндан ташқари ҳолат бор, бу борада улар мутахассис, тегишлича фикрларни кутамиз. Ҳакамлар назоратчилари вазият юзасидан қарорларини эълон қилишса, футболни ёритувчи платформалар орқали буни кузатамиз. Мен билмадим, футболчи танасининг қайсидир қисми эҳтимол олдинга чиқиб кетгандир. Бу менинг ишим эмас, мен мураббийман.

- "Бунёдкор" мезбонлар дарвозасига гол уриб олганидан сўнг кўпроқ ҳимояланди. Аксинча ҳужумкорроқ услуб жамоа учун фойдали бўлмасмиди?

- Биз голдан сўнг ҳужумкорликни йўқотиб қўйганимиз йўқ. Ўйин бошиданоқ айни услубда ўйнаётгандик, керак пайтда ҳужумга ўтдик, вазиятга қараб ҳимояландик. Ташқаридан қараганда, масалан, телевизорда томоша қилганда шундай туюлаверади. Суперлигада осон ўйин бўлмаяпти, баъзан ҳимояланиш керак бўлади, баъзан ҳужумкорликни ошириш керак. "Навбаҳор" билан ўйинда ҳам вазиятдан келиб чиқиб, шунақа ўйнадик, сўнгги сонияларда ҳисоб тенглашди. Руҳиятда ҳисобдан келиб чиқиш ўйнаш кузатилади. Ислом Исмоиловнинг эмоционал фикрларини кўрганман. Сўнгги вақтларда юз бераётган ҳолатлар бу мавзуни яна ўйлаб кўриш кераклигини кўрсатяпти.