Илёс Зейтуллаев: "Бу кетишда италияликлар бизга эмас, ўзбек футболчилари Европага боришади"

“Жуда чиройли ва яхши ўйин бўлди. Мухлисларга улар яратган атмосфера учун миннатдорчилик билдирмоқчиман. Яна икки жамоа ўйинчиларига раҳмат, чунки томошабоп, жуда жанговар футбол бўлди. Йигитлар бугун ҳам жуда аҳил, жипс жамоа эканликларини исботлашди. Жисмоний ҳолатлари, қийинчиликлар, иссиқ об-ҳавога қарамай, мана шу тўсиқларни енгиб ўтишди. Шунингдек, ”Қўқон-1912”ни ҳам табрикламоқчи эдим, чунки жуда яхши ва курашувчан жамоа, жуда яхши ташкил этилган, чемпионатда бизга муаммо туғдирган, бугун ҳам бизни ютиши мумкин эди, лекин бу ўйинда ғалаба қозондик” – дея фикр билдирди Илёс Зейтуллаев.

- "Қўқон-1912" чемпионат доирасида жамоангизни мағлуб этган эди. Ўша учрашувдан сўнг қандай хулосалар чиқарган эдингиз?

- "Қўқон" билан ўз уйимизда мағлуб бўлганимизда, бу биз учун бироз кутилмаган эди, чунки биз сўнгги сонияда ютқазиб қўйдик, аммо йигитлар тиклана олишди. “Қўқон” жуда яхши ҳимояланмоқда, лекин шу билан бирга ҳам футбол ўйнамоқда. Жуда вертикал ва самарали футбол. Шунинг учун биз қаердадир буни билардик ва бу ўйинга яхши тайёргарлик кўрдик, аммо ўйин тенг бўлди. Шунинг учун биз  руҳий фазилатлар эвазига ғалаба қозондик, деб ўйлайман.

- Дарвозабон бугун иккита пенальтини қайтарди. Унинг ғалабага қўшган ҳиссаси ҳақида фикр билдириб ўтсангиз...

- Ҳа, унинг меҳнатини пайқаганингиздан хурсандман, чунки бу йил бизда жуда кучли иккита дарвозабон бор ва улар ўртасида жуда кучли рақобат бор. Абдумавлон, мен уни биринчи кунданоқ пайқадим, у жуда профессионал футболчи, жуда кучли психолог ва у Ҳамидга ҳам жуда катта ёрдам бермоқда. Абдунабиев ҳали ёш ва бироз ўзига келиб олиши керак. У “Қўқон”га қарши учрашувда йўл қўйган хатоси ҳақида кўп ўйлаб юборди.

- Етакчи футболчилар Ҳамробеков ва Абдуҳолиқов Қўқонга келишмади. Бунга сабаб нима?

- Темурхўжа “Пахтакор”га қарши учрашувда кичик жароҳат олганди. Биз дўхтирлар билан маслаҳатлашган ҳолда унга дам беришга қарор қилдик. Ҳамробеков эса Ўзбекистон терма жамоаси билан бирга эди. Биз мураббийлар штаби билан бирга ҳар бир футболчининг соғлиғига жуда эътиборлимиз. Бугун биз Одилсиз ҳам ўйнай олишимизга ишонган эдим.

- Сиз узоқ йиллар давомида Италияда ўйнагансиз. Ҳозирги кунда италиялик ёш футболчиларни Ўзбекистонга жалб этиш имкониятга ҳақида қандай фикрдасиз?

- Ҳозирги кунда ўзбек футболи ўсиб бормоқда. Шундай темпда давом этсак, Европанинг кучли чемпионатларидаги футболчиларимиз сони анча кўпайиб қолади. Бу кетишда, италияликлар бизга эмас, ўзбек футболчилари Европага боришади. Терма жамоамиз бир неча кун олдин бизни қанчалик хурсанд қилганини кўрдингиз. Европадан кимдир бизга келса яхши, аммо бизнинг футболчилар чет элга кетишса мен кўпроқ хурсанд бўламан.

- “Бунёдкор” гуруҳ босқичида ҳам асосан ёш футболчилардан фойдаланди. Ҳозир жамоангиз чорак финал йўлланмасини қўлга киритди. Кубокдаги кейинги учрашувларда ҳам ёш футболчилардан фойдаланасизми ёки оптимал таркиб қайтадими?

- Бу саволга ҳозир аниқ жавоб бера олмайман. Ҳозир бироз дам олишимиз керак. Жамоада ҳар бир футболчи ўзининг муҳим эканлигини ҳис қилиши керак. Таркибимизда сўнгги вақтларда кам ўйнаётган футболчилар бор. Улардан бири Азизбек Тўлқунбеков. Оллаберган ҳам шундай. Улар жуда ёш ва жуда иқтидорли. Имкон қадар уларга кўпроқ имконият беришга ҳаракат қиламан.