Икром Алибоев Туркманистонга қарши ўйиндан сўнг нималар деди?

"Учрашув биз учун жуда яхши ўтди. Биринчи бўлимнинг ўзида тўртта гол урганимиз ҳам бунинг исботи деб ўйлайман.

Худо хоҳласа кейинги учрашувда Японияга қарши бундан ҳам яхшироқ ўйин кўрсатамиз. Ушбу баҳсда ўз имкониятларимизни синовдан ўтказиб оламиз. Чунки, турнир давомида барибир қитъамиз гигантларига қарши тўқнаш келамиз. Насиб қилса, ўша баҳсда яхши ўйин намойиш этиб, биринчи ўринни қўлга киритишга ҳаракат қиламиз.

Плей-оффдаги рақиб? Агар биз чемпион бўлишни истасак рақиб ким бўлишининг аҳамияти бўлмаслиги керак. Барибир мусобақа давомида кучли рақибларга қарши ўйнаймиз. Муҳими, кучни тўғри тақсимлаб, ўйиндан-ўйинга кучайиб боришдир.

Захирада қолаётганим? Бу футбол. Мураббий мени захирада қолдираётган экан, демак бу тўғри. Мени захирадан майдонга тушиб, ўйинни кучайтирувчи сифатида фойдаланиши ҳам мумкин. Балки, умуман майдонга туширмас? Нима бўлганда ҳам, бу унинг қарори. Мураббийнинг қарорини ҳурмат қилиш лозим.

Танаффусда мураббий профессионалликни кўрсатиш лозимлиги, бўшашмаслигимиз кераклиги ҳақида гапирди. Ортиқча жароҳатлардан ҳоли бўлишимиз лозимлиги, ушбу ҳисобни ушлашимиз кераклигини айтди.

Иккинчи бўлимда бироз бўшашганимиз учун мураббий асабийлашди. Ўйин олдидан берилган кўрсатмалар тўлиқ бажарилди деб ҳисоблайман", - деди Алибоев.