Эксперт фикри. Иброҳим Отахонов: "Андижон"га нафақат бугун балки кейинги ўйинда ҳам осон бўлмайди"

Аксарият учрашувларда кураш майдон ичида ёки ташқарисида бўляпти. Мухлислар жамоаларини тинимсиз қўллаб-қувватлаётган бўлса, футболчилар ўз ўйинлари билан бунга жавоб беришга ҳаракат қиляпти. "Бобур Арена" мезбонлик қиладиган "Андижон" - "Пахтакор" тўқнашуви ҳам юқоридаги каби ўтиши кутилмоқда. Бу ўйиндан олдин "бургутлар"нинг собиқ футболчиси Иброҳим Отахоновга юзландик. 

- "Андижон" - "Пахтакор" учрашувида жамоаларнинг имкониятларини қандай баҳолайсиз?

- Фикримча, "Андижон" 2 та мағлубиятдан сўнг хулоса чиқаради. Жамоа мухлислари олдида "Пахтакор"дан очко олишга ҳаракат қилади деб ўйлайман. Тахминим бугун дуранг қайд этилса керак. "Андижон"га кейинги ўйин ҳам осон бўлмаслиги аниқ, чунки Самарқандда "Динамо" билан баҳс кутиб турибди. 

- Максим Шацких жамоаси қандай таассурот қолдиряпти? Янги келган футболчиларчи?

- Янги мураббий қўл остида ҳозирча ўз ўйинини топа олмаяпти, янги футболчилар келгани жамоа зўр ўйнашини билдирмайди. Уларга ҳам мослашиши учун вақт керак бўлади. 

- ОЧЛ қуръасидан келиб чиқсак, "Андижон"га қандай рақиблар рўбарў келди?

- "Андижон" учун ҳеч бир ўйин осон кечмайди. Адашмасам, жамоага гуруҳдан чиқиш вазифаси қўйилган. Имкон қадар уйдаги ўйинларда мухлисларни хурсанд қилиб ғалаба қозонишлари керак. 

Абдулазиз Искандаров