Ҳамиджон Актамов: «Бугун иродали ғалабага эришдик»

—Бугун қийин кечган баҳсда муҳим уч очкони қўлга киритдик, — дея сўз бошлади Ҳамиджон Ғуломович. — Бизни бутун учрашув давомида уюшқоқлик билан қўллаб-қувватлаб турган мухлисларимизга раҳмат! Ўз дарвозангдан биринчи бўлиб тўп олиб чиқиб,  якунда ғалаба қозониш ҳеч бир жамоа учун осон эмас. Қолаверса, бугунги ўйин олдидан таркибимизда жиддий йўқотишлар бор эди. Дарвозабон Эркин Жабборов ҳамда ҳимоячи Алишер Юсуповларни жароҳати туфайли бошланғич таркибга кирита олмадик. Ҳимоячи Акмал Рустамов ҳисобидаги сариқ карточкалар тўрттага етганлиги, яна бир ярим ҳимоячимиз Шерали Жўраев қизил карточка олганлиги боис, бугун жамоамизга ёрдам бера олишмади. Шунга қарамай, анчадан бери захира ўриндиғида ўтирган бошқа йигитларимизга бугун имкон беришга қарор қилдик. Улар эса ўзларини ижобий томондан кўрсатди ва ишончимизни оқлашди. Қисқача айтганда, бугун иродали ғалабага эришдик.

Бунақа учрашувларда битта хато ҳам жамоани оғир аҳволга тушириб қўйиши мумкин.  «Андижон» ҳам тажрибали мураббий ва футболчиларга эга жамоа. Шунга қарамай, йигитларимиз яратилган вазиятлардан унумли фойдаланиб, муҳим уч очкони қўлга киритганидан хурсандмиз.

Кейинги пайтларда савия борасида чемпионат клублари ўртасидаги фарқ тобора камайиб боряпти. Айни пайтда барча жамоаларга қарши ғалаба учун ўйнаса бўлади. Афсуски, охирги ўйинларда футболчиларимизнинг кераксиз вазиятларда сариқ карточка олаётганликлари бизни хавотирга солмоқда. Тартиб-интизом борасида ҳали қиладиган ишларимиз талайгина.

Муҳими, охирги икки учрашувдаги омадсизликдан сўнг, бугун жамоамиз яна ғалаба қозонди. Андижонда бўладиган Ўзбекистон кубоги нимчорак финал жавоб учрашувида ҳам мухлисларимизга ғалаба тақдим этиш учун курашамиз.

«Қизилқум» ПФК Матбуот хизмати.