Ҳамид Актамовни таваллуд айёми билан табриклаймиз!

Айни лаҳзаларда Ҳамид Ғуломович ўзининг ўттиз олти ёшини нишонламоқда. Билаги куч-ғайратга тўла, тиниб-тинчимас бу инсон “Қизилқум” жамоасида шу йил июль ойининг иккинчи ярмида иш бошлаганди. Эътиборлиси, шу қисқа фурсатда кончилар  таркибида ҳақиқий футбол муҳити шаклланди, ғалабага чанқоқлик руҳи пайдо бўлди. Бугун пойтахт жамоалари учрашувига атиги 1000-2000 мухлис ташриф буюраётган бўлса, Навоийдаги “Сўғдиёна” стадионига ҳар бир ўйинга саккиз мингдан зиёд томошабин тушаётганлигининг ўзи ишқибозларнинг “Қизилқум”дан умиди ва ишончи катта эканлигини тасдиқлаб турибди.

Фурсатдан фойдаланиб, воҳа футболи фидойиси Ҳамид Актамовни таваллуд айёмлари билан самимий табриклаймиз. У кишига узоқ умр, сиҳат-саломатлик ва ишларида омадлар тилаймиз. Ишонамизки, Ҳамид Ғуломович етакчилигида “Қизилқум” жамоаси келгусида албатта, юқори натижалар қайд этиб, ўзининг чиройли ва ҳужумкор ўйинлари билан мухлисларни қувонтиради.