O'yin haqida
- "Surxon" jamoasini yarim finalga chiqqanligi bilan tabriklayman. Natija adolatli bo'ldi. Jamoamiz yomon o'yin ko'rsatmadi. Biroq, yuzaga kelgan vaziyatlarni golga aylantirishda biroz aniqlik yetishmadi. Aksincha, "Surxon" jamoasi o'z imkoniyatlaridan unumli foydalanib ketdi.
- Chempionatning ortda qolgan qismi haqida nimalarni ayta olasiz?
- Jamoamizda aksariyat futbolchilar yosh. Ular to'liq o'zlarini ko'rsata olishlari uchun vaqt kerak, moslashuv jarayoni bor. Bosqichma-bosqich kuchayib boramiz.
- Klub rahbariyati jamoa oldiga qanday vazifa qo'ygan?
- Rahbariyat bizga yuqori maqsadlar uchun kurashish vazifasini qo'ygan. Harakat qilamiz, barchamiz shuni istaymiz, mavsum yakunida "Xorazm"ni Superliga yo'llanmasiga ega chiqishi uchun kurashamiz. Bizni doimiy qo'llab-quvvatlab kelayotgan muxlislarimiz bor, ular ham har bir o'yinda g'alaba qozonishimizni istashadi.
- Transferlardan qoniqish hosil qildingizmi?
- Transferlar borasida aytsam, yomonmas, faqat belgilangan limitga amal qilish kerak. Transferlarni aynan Reglamentda ko'rsatilgan talablardan chetga chiqmagan holda amalga oshirdik.
- Jamoangiz bugun yomon o'yin ko'rsatmadi. Agar shu kabi o'yinlarini Pro-ligada ham davom ettirsa, Superliga yo'llanmasiga ega chiqadi. Bu borada fikringiz qanday?
- To'g'ri, bugun yomon o'ynaganimiz yo'q. Tarkibimizning aksariyat qismini yosh futbolchilar tashkil etadi. Albatta, biz Pro-ligada ham yaxshi o'yin namoyish etib, Xorazm viloyatiga katta futbolni qaytarmoqchimiz.
