Гюндоган Рюдигер ҳақида: "Тонида провокацион хулқ-атвор бор. У кубок финалида чегарадан чиқди"

"Барселона"га қарши Испания Кубоги финалида (2:3) Рюдигер иккинчи таймда майдондан четлатилди.  

Бош ҳакам Рикардо де Бургос Бенгоэчеа "Реал"нинг ҳужумини тўхтатганида захирада ўтирган Рюдигер ўзини бошқара олмади. Ҳакам Килиан Мбаппенинг "Барселона" ҳимоячиси Эрик Гарсияга қарши қўпол ҳаракати туфайли ўйинни тўхтатган эди. Немис футболчиси ҳакам томонга муз парчаси отиб юборди. Натижада, Антонио 6 ўйинга дисквалификация қилинди.  

"Агар Тони сизнинг жамоангизда бўлса, буни жуда зўр деб ҳисоблайсиз, лекин у рақиб бўлса, бу жаҳлингизни чиқаради.  

Тонининг дисквалификацияси етарли жазо бўлиши керак. У синовдан ўтишига тўғри келади.  

Жамоангизда Тони каби куч ва иштиёққа эга ўйинчи бўлса, буни майдонда ўз манфаатингиз учун ишлатишингиз мумкин. Мен буни Германия терма жамоасида у билан бирга ўйнаган вақтимда ҳис қилганман. Бу жамоага ёрдам беради ва мухлисларимиз буни фантастик деб билади. Баъзида бир нарса иккинчисисиз ишламайди.  

Тонида провокацион ва агрессив хулқ-атвор бор, бу унинг майдондаги ўзига хос услуби. Тони ҳиссиётли, афсуски, у Кубок финалида ҳаддидан ошди. Бу катта хато бўлганига ҳеч қандай шубҳа йўқ", – деди "Манчестер Сити" ярим ҳимоячиси Bild нашрига берган интервьюсида.  

Гюндоган Рюдигерга қарши клублар даражасида, жумладан, "Барселона" таркибида ўйнаган, шунингдек, Германия терма жамоасида у билан бирга тўп тепган.