Ғанишер Қодиров: "Қўқон-1912" билан олти очколик ўйин кутиб турибди"

"Ўйин қийин бўлишини билгандик ва чиндан шундай бўлди. Футболчилар бор кучи билан ҳаракат қилишди. Икки жамоа ҳам беллашув сўнгида ғалабани ўз томонига оғдириши мумкин эди. Кейинги ўйинларда муваффақият қозонишга ҳаракат қиламиз.

Гол урган вазиятимга келсак, тўп менга келган пайт рақиб дарвозасининг узоқ бурчаги очиқ эканлигини кўрдим. Шу боис, ўйлаб ўтирмасдан оёқ учида зарба йўлладим. 

"Шўртан" ҳар бир учрашувда яхши ўйин намойиш этмоқда, деб ўйлайман. Бир-икки майда деталлар натижаларимизга таъсир ўтказмоқда. Бу камчиликларни бартараф этиш ҳақида ҳақда мураббийлар бош қотиришмоқда. 

Тўғри, учрашув сўнгида бир киши кўп бўлиб қолганимизга қарамай, ўйинимизда бироз палапартишлик кўзатилди. Сабаби, футболчилар толиқиб қолишганди. Улар нафақат тўп билан, балки тўпсиз кўп югуришди. 

Кейинги турда "Қўқон-1912"ни ўз майдонимизда қабул қиламиз. Ҳар қандай жамоа ўз майдонида яхшироқ ўйин намойиш этишади. Бу жамоалар турнир жадвалининг охирги ўринларида боратгани учун икки ҳисса кўпроқ куч билан ҳаракат қиламиз. "Қўқон-1912" билан олти очколик ўйин кутиб турибди. Ғалаба турнир жадвалида юқорилашимизга сабаб бўлиши мумкин", деди ғузорликларнинг ягона голи муаллифи.