Футзал. "Нефтчи" - "Сўғдиёна" (4:0) ўйинидан кейин қандай фикрлар бўлди?

Шу тариқа, илк беллашувда мезбонлар ғолиб келишди. Ўйиндан кейин хар икки жамоа бош мураббийлари "Нефтчи" матбуот хизмати интервью беришди

Ойбек Абдураҳмонов (Сўғдиёна бош мураббийи):

- Қийин ўйин бўлди. Афсуски, юзага келган имкониятлардан фойдалана олмадик. Айнан шу туфайли мағлубиятга учрадик. "Нефтчи" кучли рақиб деб ўйлайман. Фарғоналиклар мавсум олдидан тажрибали футзалчиларни жамлашган. Биз эса жиззахлик ёш йигитлардан жамоа тузганмиз. Балки бизга бироз тажриба етишмаётгандир. "Нефтчи"ни ғалаба билан табриклайман. Шу ўринда, жамоамизга ажойиб имкониятларни яратиб бераётгани учун "Сўғдиёна" ПФК раҳбариятига катта раҳмат айтиб қоламан.

Фаррух Зокиров ("Нефтчи" бош мураббийи):

- "Сўғдиёна" асосан ёш футболчиларидан иборат саналади. Лекин баҳс давомида шунга гувоҳи бўлдимки, рақиб жуда тезкор ўйин кўрсатди. Биринчи бўлимда урилган 3 та гол жамоамизга руҳий устунлик тақдим этди. Шу сабаб, ғолибона кайфиятда беллашувни давом эттирдик. Лекин бу натижа билан чегараланиб қолмаймиз. Эртагалик ўйинда ҳам Жиззах жамоаси бизга жиддий муаммолар туғдириши аниқ. "Нефтчи" жорий мавсумда фақат юқори ўринлар учун курашади.

Ҳожиакбар Жабборов ёзиб олди