Эрон ОАВ: Кейрушнинг терма жамоадаги тақдири сўроқ остида қолмоқда

Шубҳа йўқки, Эрон терма жамоаси жаҳон чемпионатида Карлуш Кейруш қўл остида иштирок этади. Аммо унинг мундиалдан кейинги тақдири сўроқ остида қолмоқда. Кейруш 4 май куни Дубайда ўтказилган Осиё Кубоги қуръа ташлаш маросимига келмади, бу эса шубҳа-гумонларни яна кўпайтирди.

Журналистларнинг нима учун қуръага бормадингиз деган саволига португалиялик мутахассис Осиё Кубоги пайтида Эрон терма жамоаси бош мураббийи бўлмаслигини айтган. Яқинда Кейруш Эрон футбол федерациясидагилар билан тортишиб қолди, чунки мураббий терма жамоани мундиалга жиддий тайёрлаши учун етарли шароитга эга эмас деб ҳисоблаяпти.

Аслини олганда португалиялик мураббийнинг федерация билан жанжаллашиб қолиши биринчи бор рўй бераётгани йўқ. Карлуш Кейруш бунгача ҳам баъзи кишилар билан тортишган. Лекин бу сафаргиси анча жиддийга ўхшаяпти. Натижада маҳаллий ОАВ Кейруш бу сафар аниқ кетади деган тахминни илгари сурмоқда.

Маълумки, Эрон ЖЧда анча қийин гуруҳдан жой олган. Форслар гуруҳ баҳсларини Марокаш, Испания ва Португалияга қарши ўтказишади. Аммо январда бўлиб ўтадиган Осиё Кубогида Эрон фаворитлардан бири ҳисобланади.