Элдор Мойлиев "Насаф" футболчиси "Шўртан"га ўтмагани сабабини айтди

- Ўйинни яхши бошлагандик, гол ҳам ургандик. Афсуски кейинчалик иккита қарши ҳужумда голлар қўйиб юбордик. Иккинчи бўлимда ҳам устунлик биз томонда бўлди, лекин учинчи голни ҳам ўтказиб юбордик. "Хоразм" чуқур ва яхши ҳимояланди. Биз вазиятлар ярата олмадик. Камчиликлар устида ишлаймиз. Бизда жамоа янги. Бир-бирини тушуниши учун вақт керак бўлади. Машғулотларда камчиликлар устида ишлаймиз.

- Жамоага янги келиб қўшилган футболчилар нима сабабли жамоага қўшилди?

- Асосан ҳужум ва ўрта чизиқдаги футболчиларни жамоага чақирдик. Биринчи даврада биздаги асосий муаммо ҳужумда бўлди. Биз тўпни кўп ушлаб турсак-да, кўп ҳужум қила олмаётгандик. Шу сабабли ёш бўлса ҳам креативроқ ва олдинга ўйнайдиган футболчиларни жамоага олиб келдик. Кейинги ўйинларда улар жамоага ёрдам беради. 

- Бугунги ўйинга қандай тактика танланганди?

- Асосан прессинг эвазига ўйнашимиз, ҳужумда агрессивроқ бўлишимиз керак эди. Рақиб бизга босим ўтказишини билгандик ва айрим вазиятларда узун пасларни синаб кўрдик. Афсуски биз қарши ҳужумларда голлар ўтказиб юбордик. Дастлабки икки голда биз бурчак зарбасини амалга оширдик, бироқ голни улар уриб кетишди. Биз қарши ҳужумга тайёр эмасдик.

- Жамоада тажрибали футболчилар камдек туюлмоқда.

- Тажрибали футболчилар кам. Давралар оралиғида бундай футболчиларни олиб келиш жуда қийин. Маблағимиз ҳам катта футболчиларга етмайди. 

- Ўзингиз истаган футболчиларни олиб кела олдингизми? Амалга ошмаган трансферлар ҳам борми?

- Ҳа, амалга ошмай қолган трансферлар ҳам бор. Бир қанча легионерларни кўргандик, бироқ уларнинг трансфери ўхшамади. "Насаф"дагилар Сардор Баҳромовни берамиз дейишганди, бироқ сўнгги паллада унинг уйидагилари бу трансферга қаршилик қилишди. Жамоага олиб кела олмадик.