Даврон Файзиев: "Бугунги ғалабани узоқ йўл босиб келган мухлисларга бағишлаймиз"

"Авваламбор, "Олимпик" жамоаси раҳбариятига ўз миннатдорчилигимни билдирмоқчиман, ташкилий ишлар ҳамда сифатли майдонда тўп тепишга шарт-шароит яратиб беришгани учун.

Ўйинга тўхталадиган бўлсам, бугунги баҳсга ўта жиддий тайёргарлик кўрган эдик. "Олимпик" яхши шаклланаётган ёшлардан иборат жамоа, мураббийи ҳам замонавий фикрлайдиган яхши мутахасис ҳисобланади. Аммо ҳар бир жамоа ўз олдига ғалабани мақсад қилиб қўйган бўлади, бизнинг ҳам ўйлаган режаларимиз амалга ошди. Ўйлайманки бугунги баҳс, барчага манзур бўлди. Қолаверса, бизни ёлғизлатиб қўймаслик учун Бухоройи шарифдан ташриф буюрган мухлисларимизга катта рахмат деб қоламан. Уларнинг қўллаб қуватлашини биз ҳар доим ҳис қилиб турамиз. Ғузор, Олмалиқ ва мана бугун Тошкентда ҳам биз билан бирга бўлишди. Бугунги ғалаба мухлисларимиз учун.

Клубимиздаги ёш футболчилардан бири ҳозирда "Олимпик"да ўйнамоқда. Учтаси ўз жамоамизда қолган. Сардор Иззатов, Нуриддин Музаффаров, Анвар Жўраев. Жўраев яқинда олимпия терма жамоаси таркибида Анталиядаги турнирда иштирок этиб қайтди. Барибир кўпроқ маҳаллий футболчиларга эътибор берамиз. Лекин олдимизга катта мақсад қўйилган яъни "Бухоро"ни Суперлигага қайтариш. Қолаверса У18 жамоамизни маҳаллий бухоролик футболчилар ташкил қилишмоқда. Уларга ҳам эътибор қаратамиз. Ўзим яқиндан танишган футболчиларни барчасини жамоада олиб қолганман",- дейди Даврон Файзиев.