Цой, Тоиров, Николаев, Власичев, Кошелев ва Тожиев "банкирлар" йиғинида

Айтиш керакки, ҳозирда машғулотларда қатнашаётган футболчилар банкирлар билан келиша олса, биринчи лигада ўз олдига кучлилар сафига чиқишни мақсад қилган жамоаларга жиддий бош оғриқ бўла олади. Чунки Тошкент жамоасида ўз вақтида ҳаттоки  терма жамоамиз сафида ўйнаган футболчиларнинг шуғулланаётганини кўриш мумкин. Яқинда Италия А серияси вакили Торино билан келишувга эришган Илёс Зейтуллаев ҳам бунгача "NBU-Осиё" йиғинида иштирок этаётганди. Душанба куни пойтахтда старт олган ПФЛ Кубогида ўз иштирокини бошлаган "NBU-Осиё" дастлабки учрашувини Пахтакор ёшларига қарши ўтказиб, ғалаба қозонди. Мазкур баҳсда Ирисметов жангавор таркибни майдонга туширди. Дарвозани Юрий Цой қўриқлаган бўлса, ҳимоя чизиғи Абдумажид Тоиров бошчилигида тузилди. Шунингдек тажрибали Алексей Николаев, Леонид Кошелев, Андрей Власичев, Зайниддин Тожиев сингари футболчилар ҳам айни дамда банкирлар билан бирга шуғулланаётгани эътиборга моликдир. Уларнинг жамоага келиши қай тарзда амалга ошмоқда? Умуман тайёргарлик жараёнидан мураббийнинг кўнгли тўляптими? Шу ва бошқа бир қатор саволларга жавоб олиш мақсадида Ирисметовни суҳбатга чорладик.

"ПФЛ Кубогидаги иштирокимиз омадли бошланганидан хурсандман", - дея гап бошлади "NBU-Осиё" устози.  Ўйин ҳақида нима дейиш мумкин? Бундай қорли майдонда сифатли ўйин намойиш этиш осон эмас. Тўпни назорат қилиб бўлмайди. Ўйинчилар индивидуал ҳаракатларини иш солишига тўғри келади. Бугун ҳам ҳар иккала жамоа йигитлари шундай ҳаракат қилди (суҳбат 10 февраль куни бўлиб ўтган-И.Р).  Лекин футболчиларимизнинг кўзида ғалабага бўлган ташналикни кўриш мумкин эди. Улар катта иштиёқ билан ўйнашди. Бу ҳар қандай мураббийни хурсанд этади. 2:0 ҳисобида олдинда бораётган пайтимизда яна бир нечта гол уриш учун яхши имкониятлар юзага келганди. Аммо ундан унумли фойдалана билмадик. Кейин "Пахтакор" ёшлари ҳисобни қисқартиришга эришди. Шундан сўнг озгина асабий ўйин бўлди. Умуман олганда футболчиларнинг ҳаракатларидан кўнглим тўлди. Тўғри ўз вақтида камчиликлар ҳам учраб турди. Лекин қор қопланган майдонда ўйнаганимиз учун бу борада ортиқча эътироз билдириш ноўрин. Муҳими керакли натижага эришдик. "Пахтакор" таркибида тўп тепган футболчилар ҳам иқтидорли йигитлар эканлиги кўриниб турибди. Аммо улар ҳам бундай майдонда тўлиқ ўзини кўрсатишга қийналди. Уларнинг кўпчилиги ўринбосарлар сафидаги футболчилардир.

- Ўтган йили футболчиликн якунлаб маълум муддат мураббий сифатида ишлаган Абдумажид Тоировни яна футбол ўйнашни давом эттираётганини кўряпмиз. Бу ҳақда нима дейсиз?
- Тоиров айни пайтда ҳам бемалол футбол ўйнай олади. Бунинг учун у ўзида куч топа олмоқда. Шундай экан Абдумажиднинг футбол ўйнашига қарши чиқиб бўлмайди. Тўғрисини айтганда бу тажрибали ҳимоячи бугунги кунда айрим ёшлардан ҳам керак бўлса, яхши ўйнай олади. Футболчининг паспортига қараб, ўйнатиш керак эмас. Агарда Тоировдек футболчи бу йил жамоамизда ўйнайдиган бўлса, бу биз учун ҳам фойдали бўлади. Чунки Абдумажидда футболчи ва мураббий сифатида етарлича тажриба бор. Жорий йил мураббий сифатида дебют мавсумимни ўтказаман. Бундай пайтда менга ҳам унинг ёрдами тегади деб ҳисоблайман.

- Цой, Николаев, Кошелев, Власичев, Тожиев сингари жамоангиз йиғинида иштирок этаётган футболчилар ҳақида қандай фикрдасиз?
- Алексей Николаевнинг бугунги тайёргарлиги жуда ҳам яхши. Жисмоний томондан ҳам унда барчаси ижобий. Шунингдек ўйин амалиёти етарли. Леонид Кошелевга келадиган бўлсак, у ҳозирда аста-секин спорт формасини тиклаб бормоқда. Бироқ барибир бу йигитларда катта тажриба бор.

- Асосий таркиб айнан мазкур футболчилар иштирокида тузилмоқда. Эртага уларга олий лига жамоаларидан таклиф бўлса, кетиши аниқ. Кейин уларнинг ўрнини тўлдириш муаммо келтириб чиқармайдими?
- Биз бу ҳақда ўйлаб кўрдик. Шунинг учун иккита тенг кучли таркиб шакллантириб бормоқдамиз. Айни пайтда йиғинимизда 40 нафар футболчи иштирок этмоқда. Уларнинг кўпчилиги ёшлардан иборат. Айнан шу ёшлардан ҳам битта таркиб тузганмиз. Агарда сиз айтгандек бўлса, йўқотишларнинг ўрнини тўлдира оладиган йигитларга эгамиз. Бундан ҳавотир олиш керак эмас. Мисол учун ПФЛ Кубогида иштирок этаётган таркибимиз тажрибали футболчилардан иборат бўлса, қолган иккинчи таркибимизни синов-назорат ўйинларини ташкил этган холда синаб кўрмоқдамиз. Қолаверса асосий таркибда 1995 йилда туғилган икки нафар футболчини доимий равишда ўйнатмоқдаман. Тўғри ҳамма футболчиларга ўйнаш имконини беришимиз қийин. Шу боис кун ора назорат ўйинларини ташкил этмоқдамиз. Бу орқали уларнинг нималарга қодирлигини кўриб, саралаб оламиз.

- Юқорида номлари айтиб ўтилган тажрибали футболчилар бу йил олий лига клубларидан ўрин олмаса, у холда "NBU-Осиё"да ўйнаши мумкинми?
- Тан олиш керак, моддий жиҳатдан жамоамизнинг имконияти у қадар юқор эмас. Лекин шуни истардимки, бу йигитлар биринчи ўринга ойлик маошни қўймасдан жамоамизга ёрдам беришларини. Имкониятим бўлганида уларнинг ҳаммасини жамоамда олиб қолган бўлардим. Лекин уларни мажбурлаб олиб қолиб ҳам бўлмайди. Ҳаммаси уларнинг ўз ихтиёрига боғлиқ.

- Маълум муддат жамоада шуғулланиб, кейинчалик ўзга клубга ўтиб кетса, бундан сизларга нима наф?
- Бу футболчилар йиғинимизда иштирок этиб туришини ўзлари сўрашди. Кеча ўзим ҳам улар билан бирга футбол ўйнаганман. Шунинг учун қандай қилиб уларга рад жавобини беришим мумкин. Тажрибали ўйинчиларнинг биз билан шартномаси йўқ. Акс холда уларни элита жамоаларига сотиш орқали моддий фойда кўрардик. Лекин инсонийлик жиҳатдан ҳам уларнинг ўзига жамоа топгунига қадар шуғулланиб туришларига руҳсат бердик. Яқинда Илёс Зейтуллаев ҳам биз билан бирга шуғулланиб, якунда Италия "А" серияси вакили "Торино" билан шартнома тузишга эришди. (Кулиб) Қўлимиз енгил шекилли. Балки қолган футболчилар ҳам бизнинг жамоадан олий лигага йўл олар. Чемпионат стартига қадар регламент бўйича 25 нафар футболчини рўйхатдан ўтказамиз. Агарда шулардан 5 нафари тажрибали ўйинчилардан иборат бўлса, мақсадга мувофиқ бўларди. Қолган 20 нафари ўз қарашларимизга мос тушган ёшлардан иборат бўлади. Яқин орада раҳбарият шартнома имзолашга руҳсат берса, талабимизга жавоб берган ўйинчилар билан битим тузамиз.

- Ўзларини кўрсатаётган ёшлардан кимларни аълоиҳад кўрсата оласиз?
- Бу борада кимнидир айта олмайман. Аммо ўзини кўрсатишга интилаётган болалар ҳам йўқ эмас. Ҳозир "Пахтакор" ёшлар жамоасидан Владислав Павловский билан Жамолиддин Саидов бор. Шунингдек "Бунёдкор" ўринбосарлар таркибидан ҳам бир нечта ёшлар келган. Уларни синовдан ўтказяпмиз. Очиғини айтганда, 1995 йилда туғилган футболчиларни топиш қийин кечмоқда. Тажрибали ўйинчиларку етарли. Бироқ ёшлар ҳозир ҳамма клубга керак.

Исломбек РУСТАМБЕКОВ суҳбатлашди.