Буюк 10-рақам эгаси 43 ёшда (ФОТО)

Пинтуриккьо деярли бутун фаолиятини "Ювентус"да ўтказган. Туриндаги 19 йиллик фаолиятидан сўнг Алекс жамоадан кетишга мажбур бўлган. Аслида Дель Пьеро текинга бўлсада "Юве" учун фаолиятини сўнггига қадар ўйнамоқчилигини эълон қилганди. Аммо "Ювентус" раҳбарияти ва бош мураббий Конте қариб қолган Дель пьеро билан битимни узайтиришни истамаган.

Футболдаги чанқоғи ҳали босилмаган Пинтуриккьо "Ювентус"дан бошқа европанинг ҳеч бир жамоасида ўйнашни истамагани учун Осиёдан ташган таклифга лаббай деб жавоб берган.

Шундан сўнг афсона 2 йил Австралияда "Сидней" шарафини ҳимоя қилди, кейин эса бир муддат Ҳиндистонда "Дели Дайнамос" либосини кийди.

2015 йилда эса миллионлаб футбол ишқибозларини ёқимтойи бутсаларини михга илишга қарор қилди.

Алессандро Дель пьеро футболчилик фаолиятини давомида кўплаб шахсий ютуқларни қўлга киритмаган, "Олтин тўп"га ҳеч қачон эга чиқмаган. Лекин бу футболчи доим энг яхши қаторида бўлган, футболни бир маромда юқори савияда ўтказган кам сонли футболчилардан ҳисобланади.
Алексга қайсидир жиҳатдан жароҳатлар ҳам "Олтин тўп"ни олишига тўсқинлик қилган дейиш мумкин.
Аммо футболчи ҳеч қачон шахсий совринни жамоавий ютуқдан устун қўймаган.

Дель Пьеро футбол майдонида нозик дид соҳиби саналган. Дель Пьеро жарима майдонининг чап тарафидан гол уриш бўйича мутахассис саналган. Жарима майдонининг чап тарафи атрофидан урилган барча голларни матбуотда "Дель пьеро голи" дея аташган.

Жарима зарбаларини ижро этиш маҳорати, тўп билан муомала қилиш санъати ва гол сезиш қобилияти Алесда юксак даражада бўлган.

90 йиллардаги авлоднинг жуда катта қисми айнан Алекс Дель пьеро туфайли футбол ошно бўлган, унинг ўйинларини кўриб миллионлар ўйинига меҳр қўйган.

Дель Пьеро ўз вақтида "Ювентус" Б Серияга тушиб кетган пайтда ҳам "бьянконерилар"га содиқ қолган ва Буффон, Недвед каби юлдузлар билан жамоани А Серияга қайтарган "Юве"нинг буюк қаҳрамонларидан бири бўлган.

Алекс Дель пьеро А ва Б Серияда тўпурарликни қўлга киритган ягона футболчи саналади. 2006 йилда "Юве" Б Серияга сургун қилинганда Дель пьеро бўйича жуда катта таклифлар туринликларга келиб тушади. Лекин мағрур Алекс бу таклфиларга қайрилиб ҳам қарамайди. Унинг фикр-у ҳаёли фақат "Юве"да ва жамоани тезроқ қаддини кўтаришга қаратилганди.

Дель Пьеро ҳақида жуда кўп ёзиш, тўхтовсиз мақташ мумкин. У ҳақида жуда кўплаб қизиқарли маълумотлар, футболчилар учун дарсликларга киритиш мумкин бўлган маслаҳатларни қоралаш мумкин.

Бугун маэстро, буюк 10-рақам эгаси 43 ёшга тўлди.

Ажойиб футболчи, такрорланмас зарбалар соҳиби ва беназир голлар муаллифи - Алессандро Дель Пьерони туғилган куни билан табриклаймиз.

Қуйида Алекс Дель Пьеронинг ажойиб суратларини тақдим этамиз.