✅ "Бухоро" - "Нефтчи"
"Нефтчи" ўйинчиси оддий спортга хос услубда яккакурашга киришган. "Бухоро" ўйинчиси рақиб билан тўқнашгани учун эмас, балки ўз ихтиёри билан йиқилиб, жарима ишлашга уринмоқда. Бизнингча, тўғри қарор – ўйинни давом эттириш. "Нефтчи"нинг голи тўғри равишда инобатга олинган.
✅❌ "Бухоро" - "Нефтчи"
Ҳакам воқеани тўғри баҳолаб, "Нефтчи"нинг 5-рақамли ўйинчисига қизил, "Бухоро"нинг 93-рақамли ва "Нефтчи"нинг 8-рақамли ўйинчиларига иккита сариқ карточка кўрсатди. Бироқ ҳакамлар "Бухоро"нинг 10-рақамли ўйинчисига ҳам сариқ карточка кўрсатишлари лозим эди: у "Нефтчи"нинг 5-рақамли ўйинчисини итариб юборди ва шу тариқа бу тўқнашувнинг кучайишига сабаб бўлди. Унинг бу ҳаракатини "носпортча хулқ-атвор" деб баҳолаш мумкин.
✅ "Қўқон-1912" - "Пахтакор"
Мавжуд такрорларга асосланиб, ҳакамлар тўғри қарор қабул қилгани тахмин қилишимиз мумкин. Тўп "Пахтакор" дарвозаси чизиғидан тўлиқ ўтмаган, шу сабабли гол ҳисобланмаган.
✅ "Қўқон-1912" - "Пахтакор"
Иккала ўйинчи ҳам тўпга интилди, шундан сўнг арзимас тўқнашув юз берди. Бу ҳолат "Пахтакор" футболчисининг йиқилишига сабаб бўлмаган. Ҳакамнинг ўйинни давом эттириш қарори тўғри, ВАРнинг ҳам аралашмагани ўринли.
✅ "Қизилқум" - "Андижон"
Дастлаб ҳакам майдон марказида "Қизилқум" футболчисининг қўл билан ўйнашини қайд этмай, хатога йўл қўйди. Шундан сўнг у пенальти белгилади, аммо ВАР вазиятга тўғри аралашиб, бош ҳакамни монитор олдига таклиф қилди. Тўғри қарор – "Қизилқум" футболчиси қўл билан ўйнаган жойда "Андижон" фойдасига жарима зарбаси белгилаш.
✅ "Хоразм" - "Сўғдиёна"
Ҳакам тўғри қарор қабул қилиб, рақибни гол уриш учун яққол имкониятдан маҳрум қилгани сабабли "Хоразм" жамоаси ўйинчисини майдондан четлатди. "Сўғдиёна" жамоаси ўйинчиси тўпни назорат қилаётган эди, "Хоразм" ҳимоячиларидан ҳеч бири ўз вақтида ёрдамга етиб келолмади.
✅ "Сурхон" - "Шўртан"
Бизнинг фикримизча, ҳакам ўйинни тўғри давом эттирди ва "Сурхон"нинг голини ҳақли равишда инобатга олди. Қанотдаги яккама-якка кураш қоидабузарлик ҳисобланмайди – елкама-елка куч ишлатиш, тўпдан рақибни “сиқиб чиқариш” унсури бор эди.
Шу тариқа, Суперлиганинг 28-тур ўйинларида ҳакамлар фақат битта хатога йўл қўйишди.
