Asosiy tarkib a'zolari kecha Navoiy shahriga yetib kelishdi va kechki payt o'yin bo'ladigan stadionda mashg'ulot o'tkazishdi. Futbolchilarni Mirko Yyelichich va Andrey Miklyaev shug'ullantirgan bo'lsa, darvozabonlar bilan Pyotr Gizimchuk ishladi. Shuni aytish lozim, “Qizilqum” stadionining maydon holati ideal darajada emas. Bunday maydonda qanday qilib chiroyli o'yin ko'rsatish mumkin, hayronmiz. Buning ustiga PFLning bunday maydonda oliy liga uchrashuvlarini o'tkazishga ruxsat berganini ham tushunish mushkul.
Bizga maylum bo'lishicha, Navoiydagi yangi stadion foydalanishga topshirilgan, biroq uning ham maydoni yaxshi emas, shu bois ta'mirlash ishlari olib borilmoqda. “Qizilqum” bilan o'yinda asosiy himoyachilarimizdan biri Islom To'xtaxo'jaev engil jarohati bois ishtirok eta olmaydi. Murabbiylar uni Toshkentda qoldirishdi. Qolgan barcha o'yinchilar esa sog'-salomat va ular bugungi o'yinga tayyor.
Maydon holati yaxshi bo'lmagani sabab bugun “Lokomotiv”ning nafaqat raqib, balki maydon bilan ham kurashishiga to'g'ri keladi. Shunday ekan, futbolchilarimizga qiyin bo'lishi aniq, ammo har qanday holatda ham g'alaba qozonmasak bo'lmaydi. Chunki “temiryo'lchilar”ni hozirda peshqadam “Paxtakor” bilan atigi bir ochko ajratib turibdi va mabodo “Paxtakor” ochko yo'qotadigan bo'lsa, bizda birinchi o'ringa ko'tarilib olish imkoniyati paydo bo'ladi. Shunday ekan, jamoamizdan bugungi bahsda ham navbatdagi uch ochkoni qo'lga kiritishini kutib qolamiz.
Quyidagi fotosuratlar orqali “Qizilqum” stadionining bugungi holatini ko'rishingiz mumkin.
