Бугун футбол. "Металлург" - "Нефтчи"

"Металлург"дан фарқли ўлароқ "Нефтчи"нинг турнир жадвалидаги ҳолатига ҳавас қилиб бўлмайди. Бу анчадан бери айтиб келинаётган гап. Бекободликлар 24 очко билан 6-ўринда боришмоқда. "Нефтчи" эса 8 очко тўплаган ҳолда охирги ўринни эгаллаб турибди.

"Нефтчи"нинг мавсум бошидан бери ҳали ғалаба қозонмагани ҳам эскирган гап бўлиб қолди. Чунки жамоа 18та ўйиннинг 10тасида мағлуб бўлиб 8 бор дуранг қайд этган. Тўплар нисбати 8-25. 

"Нефтчи" ҳар турда ғалаба қозонишга астойдил ҳаракат қиляпти. Масалан, сафарда АГМК ва "Бунёдкор" билан кечган ўйинларда яхши футбол намойиш этди. Айниқса Олмалиқдаги ўйин "Нефтчи" иштирокидаги энг чиройли баҳслардан бири бўлди. Лекин озгина омад етишмади.

Биласизми? "Нефтчи" охирги тўртта турнинг учтасида дуранг қайд этди. Бу жамоа ҳозир шунчаки футбол ўйнаяпти. Балки ғалабали онлар ҳам келиб қолар.

"Металлург" бугун ўз майдонида 10-учрашувини ўтказади. Аввалги 9та беллашувнинг тўрттасида бекободликлар зафар қучишган. Учта ўйин дуранг билан якун топган бўлса, икки бор мағлубият қайд этган. Тўплар нисбати 10-10. "Металлург" уйдаги ўйинларда 15 очко жамғарган.

Факт: "Металлург" ўз уйидаги охирги икки ўйинда ғалаба қозона олмади. Жамоа "Насаф" ва "Бунёдкор" билан дуранг ўйнади. Сўнгги бор Бекободда "Локомотив" 2:0 ҳисобида мағлуб этилган.