Бугун футбол. "Металлург" - "Насаф"

Охирги пайтларда "Насаф"нинг ҳеч омади келмаяпти ва кўпчилик буни жамоадаги молиявий ҳолат билан изоҳламоқда. Балки шундайдир, балки бошқа сабаблари ҳам бордир. Лекин факт шуки, "Насаф" охирги бешта учрашувдан тўрттасида мағлубиятга учради.

Мусобақа жадвалида "Насаф" ўзига ярашмаган ўринни эгаллаб турибди: 7-ўрин. "Металлург" эса "Насаф"дан бир поғона юқорида бормоқда. "Металлург" шу пайтгача 19, "Насаф" 17 очко жамғарган.

Бекободликлар доим ҳам бир текис ўйин намойиш эта олишмаяпти. Жамоа ўз майдонида "Бухоро" ва сафарда "Қизилқум"ни мағлуб этганидан сўнг кетма-кет икки учрашувда ютқазиб қўйди. Охирги уй ўйинида эса "Локомотив"ни 2:0 ҳисобида мағлуб этди.

"Насаф" ҳақида гапирадиган бўлсак, бу жамоа қаторасига саккиз беллашувда мағлубият нималигини билмади, бироқ шундан кейин уч бор мағлуб бўлди. Орада "Нефтчи" 2:0 ҳисобида ютган "Насаф" аввалги турда "Бухоро"га имкониятни бой берди.

Агар "Металлург" бугун ҳам ўз майдонида "Локо"га қарши ўйинини намойиш этадиган бўлса, "Насаф"га жуда қийин бўлади. Мабодо "Насаф"ғалаба қозонгудек бўлса, унда муваффақиятсизликлар гирдобидан чиқиб кетиши мумкин.