Бугун футбол. "Локомотив" - "Сурхон"

Ўзбекистоннинг амалдаги чемпиони "Локомотив" ўз майдонида Термизнинг "Сурхон" клубини қабул қилади. Учрашув "Локомотив" стадионида 19:30да бошланади. Қуйида ўйинга оид баъзи маълумотларни келтириб ўтамиз. 

"Локомотив"

- "Локомотив" Суперлига турнир жадвалида 2-ўринни эгаллаб турибди. Жамоа 10та ўйиндан сўнг 21 очко жамғарди. Тўплар нисбати 16-7. 

- Бугун "Локомотив" ўз майдонида 7-учрашувни ўтказади. Аввалги олтита баҳснинг тўрттасида "темирйўлчилар" ғалаба қозониб, икки бор дуранг қайд этишган.  

- Уйдаги ўйинлар ҳолатига кўра "Локо" жадвалда иккинчи ўринда боряпти. Уйдаги ўйинларда тўплар нисбати 12-4. 

- Қаторасига учта дурангдан сўнг "Локо" ўтган турда ғалабага эришди. Жамоа сафарда "Насаф"ни 1:0 ҳисобида мағлуб этиб қайтди. 

- "Локомотив" шу пайтгача "Сурхонга қарши 2 бор куч синашиб иккаласида ҳам дуранг қайд этган. 

"Сурхон"

- Суперлига дебютанти "Сурхон" мусобақа жадвалида учинчи ўринда кетяпти. Жамоа 18 очко тўплаган. Тўплар нисбати 11-8. Бундан кўриниб турибдики, бугун иккинчи ва учинчи ўриндаги жамоалар ўзаро баҳс олиб боради. 

- "Сурхон" бош мураббийи Андрей Микляев ўз вақтида "Локомотив"ни бошқарган. Бугун Андрей Геннадьевич шогирдлари собиқ жамоасига қарши майдонга тушади. 

- "Сурхон" сафарда очко йиғиш бўйича тўртинчи ўринда. Термизликлар иккитадан ғалаба ва мағлубият қайд этишган. Тўплар нисбати 6-6. 

- "Сурхон" сафар ўйинларида "Сўғдиёна" билан "Қизилқум"ни мағлуб этиб, "Навбаҳор" ва АГМКга имкониятни бой берган. 

- "Сурхон" охирги учта ўйинни ғалаба билан якунлади. Микляев бошқарувидаги жамоа "Бухоро", "Қизилқум" ва "Қўқон-1912"ни мағлуб этди.