"Болалар футболида натижа талаб қилинмайди. Лекин...". "Сурхон U-14 ва "Сўғдиёна U-14" мураббийларининг илк турдан кейинги фикрлари

Голларга бой ўтган ўйинда термизлик ёш иқтидор соҳиблари жиззахлик тенгқурларини 8:4 ҳисобида мағлубиятга учратди. Мазкур баҳсдан сўнг икки жамоа мураббийларнинг фикрларига қулоқ тутдик.

Ориф Аноров ("Сурхон U-14" жамоаси бош мураббийи) - Тўғриси бу мусобақага анча вақтдан бери тайёргарлик кўриб келаётгандик. Ушбу чемпионатда кучсиз жамоа бўлмайди. Ҳамма муносиб ҳозирлик кўриб келади. Болалар кейинги ёш тоифаларидаги жамоаларга шундай турнирлар орқали ўтиб боради. Дарвоза чизиғда камчиликларимиз борлиги кўринди. Лекин хато ва камчиликлар бўлиб туради. Болаларга ҳужумкор футбол кўрсатишни айтгандик. Кўрсатмаларимизни бажаришди. Ўйинимиз устида яна ишлаймиз. Ҳозирда карантин ва пандемия даврида ҳеч кимга осон эмас. Бироқ клуб қўлидан келганча барча шароитларни яратиб берди. Йиғинлар ташкиллаштирилди, спорт кийимлари берилди. 

Улуғбек Алматов ("Сўғдиёна U-14" бош мураббийи) - Йўлдан келганимиз учун бироз қийналдик. Болалар очиқ футбол кўрсатишди. Ўйиндан қониқдим, лекин натижадан эмас. Клуб барча шароитларни қилиб берди. Худо хоҳласа академиямиз қурилмоқда. Ҳаммаси олдинда. Тўғри болалар футболида натижа талаб қилинмайди. Лекин босқичма-босқич бунга келишимиз керак. Барибир болаларга мотивация зарур.