Бобур Зуҳриддинов: "Мавсумнинг иккинчи қисмидан бошлаб ўринбосарлар билан ишладим"

Мавсумнинг сўнгги турида "Пахтакор" ўринбосарлари билан ҳисоб-китоб қилган "Обод" ёшлари мағлубиятга учради. Беллашувдан кейин меҳмонлар устози Бобур Зуҳриддиновнинг фикрлари билан қизиқдик.

- Учрашув яхши ўтди, дея оламан. Об-ҳавонинг ноқулайлиги ўйиннинг боришига таъсир қилди, албатта. Ҳар иккала жамоа аъзоларида ҳам гол уриш учун бир қатор имкониятлар бўлди. Мезбонлардан фарқли равишда биз голли вазиятлардан фойдалана олмадик. Аксинча, майдон эгалари дарвозамизни ишғол қилиб, ғалаба қозонишди.

Мавсумнинг иккинчи қисмидан бошлаб ўринбосарлар билан ишладим. Олий лигада тажрибали футболчилар билан ишлар эдим. Шу боис ёшлар билан ишлашда бироз қийинчиликка дуч келдим. Яъни, нимани хоҳлаётганимни тушунтириш борасида озгина қийналдим. Лекин айтишим мумкин, ўринбосарлар таркибида иқтидорли болалар етарлича. Агар улар ўз устида ишлашни тўхтатмаса, келаси мавсум асосий таркибда ўйнаш имкониятига эга бўлишади.


«Обод» ФК матбуот хизмати