Бекзод Ғанижонов: «Андижондаги ўйинда тажрибасизлигимиз панд берди»
23 май 2016 18:01
Янгиликлар

Бекзод Ғанижонов: «Андижондаги ўйинда тажрибасизлигимиз панд берди»

Ўзбекистон кубоги 1/8 финал босқичининг «Андижон» — «Қизилқум» жамоалари жавоб учрашувидан (3:1) сўнг, навоийликларнинг ўн саккиз ёшли ҳужумчиси Бекзод Ғанижонов ўйин ҳақидаги фикрлари билан ўртоқлашди.

— Ушбу ўйин олдидан жамоамиз таркибида бир қатор жиддий йўқотишлар бор эди, — дейди Бекзод Ғанижонов. — Шу боис, жамоамиз бош менежери Ҳамиджон Актамов ҳамда мураббийлар учрашувда биз ёшларга имконият беришга қарор қилишди. Ўйинни дастлабки дақиқаларидан майдонга тушганимдан ва менга билдирилган ишончдан жуда хурсанд бўлдим.

Тажрибали футболчилардан таркиб топган «Андижон» жамоасига қарши ёмон ўйнамадик. Кўплаб голли вазиятларни юзага келтирдик. Афсуски, уларни самарали якунлашда тажрибасизлигим панд берди. Бу эса ҳали ўз устимда кўпроқ ишлашим ва майдонда астойдил тер тўкишим зарурлигини кўрсатиб берди. Энди бор эътиборимни машғулотларга қаратган ҳолда чемпионат учрашувларида ҳам асосий таркибга қўшилишга интиламан.

«Қизилқум» ПФК Матбуот хизмати.