Бахтиёр Бобоев: "Бу йил ОЧЛда камида гуруҳ босқичидан чиқишга уринамиз"

Бахтиёр Бобоев (“Бунёдкор” бош директори): “Бу йил юртимизда Халқ билан мулоқот ва инсон манфаатлари йили деб эълон қилинди. Шу боис сизлар билан мулоқот қилиш мақсадида бу ерга йиғилдик. Янги мавсумга тайёргарлик ҳақида нима дейишим мумкин. Биз доим ўз олдимизга юқори мақсадларни қўйганмиз. Клубимиз сафида ўз тарбияланувчиларимиз ўйнаши асосий мақсадимиз ҳисобланади. Ўтган мавсум олий лигада жамоамиз иккинчи ўринни олди, ёшлар лигасида эса чемпион бўлдик. ОЧЛ плей-офф босқичидан муваффақиятли ўтдик. 

Бу йилги илк расмий ўйинда ёш футболчилар Нурилло Тўхтасинов ва Жавоҳир Эсонқулов майдонга тушишди. Улар ўзларини халқаро майдонда йўқотиб қўйишмади. Бундан ташқари яна бир қатор ёш футболчилар асосий таркибга яқин келишмоқда. 

Элдор Шомуродов, Достонбек Ҳамдамов ва Отабек Шукуровга хориждан таклифлар бор. Бу футболчилар борасида ўша клублари билан музокара кетмоқда. Агар Европанинг номи чиққан клублари билан келиша олсак уларни қўйиб юборамиз. Чунки ёш футболчилар ўсишлари керак.

ОЧЛ гуруҳ босқичидаги илк ўйинни Саудия Арабистонида “Ал Аҳли”га қарши ўтказамиз. Сўнгги йилларда жамоамиз гуруҳдан чиқа олмаяпти. Бу йил гуруҳимиз жуда кучли клублардан иборат бўлишига қарамай қора анъанага барҳам бериб, камида гуруҳ босқичидан чиқишга уринамиз.

Бундай тадбирлар ҳар 3 ойда ўтказилиши тарафдориман. Мухлислар ҳам, журналистларда ҳам клубимиз борасида саволлар бўлса шундай тадбирларда бемалол беришлари мумкин".