Бахтиёр Ашурматов: “Иккинчи йилдирки, мавсумни собиқ жамоаларимга қарши ўйин билан бошлаяпман”

Бугунги Суперлигага қуръа ташлаш маросимидан сўнг бош мураббий Бахтиёр Ашурматов ўз фикрлари билан ўртоқлашди.

“Гапнинг очиғи, бундан олдинги мавсумларда АГМК жамоасида ҳам ишлаганман. 2019 йил бошида “Бухоро”ни қабул қилиб олганимдан кейин биринчи турни собиқ жамоамга қарши ўтказган эдим. Тақдир тасодифини қарангки, кетма-кет иккинчи йилдирки мавсумни яна аввал фаолият олиб борган жамоамга қарши ўйин билан бошлаяпман. Албатта, бу қизиқ ҳолат. Қайсидир маънода мен учун кутилмаган совға ҳам бўлди. Айтиб ўтилганидек, биринчи давра якунига қадар Суперлигадаги барча жамоалар билан ўйнаб чиқамиз. Шунинг учун рақиб танлашимиз бироз нотўғри бўларди. Ўйлайманки, “Бухоро”га қарши учрашув стадионга келадиган мухлислар учун қизиқарли бўлади. Маросим юқори даражада ўтказилганини алоҳида таъкидлаган бўлардим. Бир-бирига муносиб рақиблар илк турда ўзаро тўқнаш келмоқда. Масалан, турнинг марказий беллашуви сифатида “Пахтакор” ва “Навбаҳор” иштирокидаги ўйинни мисол қилиб келтириш мумкин”, – деди “Қўқон-1912 бош мураббийи.