Азамат Исроилов: “Қизилқум” билан ўйин томошабоп бўлди”

Учрашувдан сўнг “бургутлар” ҳимоячиси Азамат Исроилов ўз фикрлари билан ўртоқлашди. 

- Мураббийимизнинг туғилган кунига муносиб совға тайёрлаш мақсадида фақат ғалаба учун ўйнадик. Лекин мезбонлар ҳам ўз уйида мағлуб бўлмаслик илинжида астойдил харакат қилди. Учрашув тенг курашлар остида ва шу билан бирга томошабоп бўлди. Омадимиз келиб 8-дақиқадаёқ ҳисобни очишга эришдик. Аммо кейинчалик ўз дарвозамиздан иккита тўп ўтказиб юбордик. Рақиб футболчилари кўпроқ стандарт вазиятларда яхши ўйин намойиш этди. Голларни ҳам стандарт вазиятлардан сўнг уришди. 

- Аммо иккинчи бўлимда ҳисобни тенглаштиришни уддаладик. Нима ҳам дердик Кубок ўйинида илк учрашувда сафарда дуранг қайд этиш ҳам аслида ёмон натижа эмас. Шу боис бу биз учун ғалабага тенг бўлди. Кейинги ўйин олдидан руҳий устунлик бериши турган гап. “Қизилқум” билан Андижонда жавоб ўйини турибди. Насиб қилса ўз мухлисларимизни қувонтирамиз. 

- Энди кейинги эътиборимизни “Қўқон-1912”га қарши кечадиган баҳсга қаратган холда, бўлажак учрашувга тайёргарлик кўрамиз. Аҳамияти юқори бўлган ўйинда фақат ғалаба керак. Ишқибозларимизни хурсанд қилиш ниятимиз бор. Рақибни хурмат қилган холда шуни айтишим мумкин, сафардан ғалаба билан қайтса бўлади – дейди Азамат Исроилов.