Асрор Алиқулов: "Биз таклиф қилган футболчилар клубимиз чорловини охирги ўринга қўйишди"

"Бугунги баҳсга "Турон" жамоасининг кучли ва кучсиз томонларини ўрганиб чиқиб режа тузган эдик. Яккакурашларда футболчиларнинг имкониятларини ҳисобга олдик. Биз гол урганимиздан сўнг рақиб бир киши кам бўлиб қолгач футболчилар бўшашишди. Шунинг эвазига ғалабани қўлдан бой бердик. Улар дарвозамизга иккита тўп киритишга эришишди", - дейди Асрор Алиқулов. 

- Голдан кейин ўйин суратини тушириш мураббийнинг кўрсатмасимиди? 

- Бундай кўрсатма берилмади. Барибир улар шошишди. Тўпни ўзимизда кўпроқ ушлашимиз керак эди. "Турон" оддий вазиятдан гол уриб кетди. 

- Муҳриддин Зоировнинг ўйин давомидаги ҳаракатларига қандай баҳо берасиз?

- Мушакларида муаммо бўлиши мумкин. Лекин жиддий жароҳат йўқ. Ўйинига келадиган бўлсак, ҳаракат қилмоқда. У бундан ҳам яхши ҳаракат қила олади. 

- Ўтган йили "Шўртан" муаммолар гирдобида қолганди. Бу йил сиз йиғган таркиб ғузорлик мухлисларга нимани ваъда бера олади?

- Биз таклиф қилган футболчилар клубимиз чорловини охирги ўринга қўйишди. Бир нечта вариантлар ўхшамаган ҳолда келишлигини айтишди. Шароитимизга рози бўлган футболчилар билан жамоани тўлдирдик. Бугунги ўйинимиз билан юқори ўринларга ҳаракат қилишимиз шарт. Ҳеч кимдан кам эмасмиз. 

- Раҳбарият томонидан сиз сўраган футболчилардан нечтаси олиб берилди?

- Раҳбарият молиявий талабни айтади, шунга яраша футболчиларни жалб қиламиз. "Шўртан" яхши ўйин кўрсатса футболчиларимизга қизиқиш ортади. Ҳозирги ҳомийимиз ҳам қараб турмаяпти. Насиб қилса, бир икки йилда бу футболчилар яхши савияга чиқади.