Артём Филипосян: “Танаффусда мураббийлар берган кўрсатма ғалаба омили бўлди”

- Давралар оралиғидаги танаффусдан сўнг биринчи расмий ўйинимиз бўлгани учун ҳаяжон туфайли биринчи бўлимда ўйинимиз қовушмади. Қолаверса, баъзи ўйинчиларнинг терма команда йиғинида, баъзиларнинг жароҳати туфайли анча вақт машғулотларда бирга ишламаганимиз ҳам бунга таъсир кўрсатди.

Танаффусда мураббийлар штаби биз билан жиддий суҳбат ўтказиб, керакли кўрсатмаларни беришди. Иккинчи таймда ана шу кўрсатмаларга амал қилган ҳолда дастлаб ҳисобни очишга, сўнгра уни йириклаштиришга муваффақ бўлдик. Ҳимоячи сифатида дарвозамиз дахлсизлигини сақлаб қолганимиз мен учун ёқимли бўлди. Биринчи таймда ўйинимиз чиқмаганда ҳам, иккинчи бўлимдаги ғалабамизда ҳам бизни бирдек қўллаб-қувватлаган мухлисларимизга раҳмат айтаман.

“Қўқон-1912” жамоаси ҳақида гапирадиган бўлсак, иккинчи даврада улар сафига яхши ўйинчилар йиғилибди. Биринчи ўйинданоқ, жамоанинг ўйин услуби яхши томонга ўзгаргани гувоҳи бўлдим. Шу боис улар кейинги ўйинларда кўпчилик етакчиларга муносиб қаршилик кўрсатади, деб ўйлайман, - дейди А. Филиппосян.

“Бухоро” ПФК Матбуот хизмати.