"Арсенал" мавсум охирида Артета билан хайрлашади!

Микель Артета "Арсенал" билан муваффақиятга эришиш учун барча зарур шарт-шароитлар яратилган.

Анри Артетанинг ҳолатини идеал тарзда ифодалаб берди

"Арсенал" 2019 йил декабридан буён бош мураббийини алиштиргани йўқ. Фақатгина биринчи мавсумда Артета маълум вақт давомида курашиш, ўйинларни ютиб бориш талаб қилинадиган мусобақада ғолиб бўлди, бу – Англия Кубоги. Бундан кейин мамлакат Суперкубогида икки бор зафар қучилди – бу соврин учун кураш битта ўйиндан иборат. Кетма-кет уч бор "Арсенал" АПЛ жадвалида иккинчи бўлди. Шу сабабли клуб афсонаси Тьерри Анри Артета танқидчиларини қўллаб-қувватлади. Микель балки "Арсенал" собиқ форвардини шунчаки ҳасад қилишда айблаши мумкин. Анрининг айнан мураббийликда кетмони ҳозирча учмаяпти. Франциялик Микелга мабодо чиқиш эшиклари кўрсатилган тақдирда ҳам Лондон клуби бош мураббийилигига таклиф қилинмайди. Тўғри, Анри қайсидир маънода ҳасад қилган бўлиши ҳам мумкиндир, аммо у мураббий сифатида ўзининг салоҳиятини тўғри тушунди ва энди бой клублар билан ишлашга ошиқмаяпти. 

"Арсенал" мени таажжублантирди дея олмайман, аммо одамлар жамоа иштироки ҳақида бундай саволлар бераётгани нормал ҳолат. Аввал бошида, Артета жамоага энди келганида, коллектив унга бегона эди. Мураббий истаган барча нарсани ўзгартириш учун камида 2-3 та трансфер ойнаси керак. Мураббий ўз ғояларини амалга ошириши учун вақт керак бўлади. Лекин охирги уч мавсум "Арсенал" камида битта соврин ютиши ёки ҳеч бўлмаса катта финалга эришиши керак эди. "Манчестер Юнайтед" охирги беш йилда бешта финалда ўйнади. Ҳа, эринмаган футбол мухлиси борки, кулгига мавзу қилиб кўрган ўша "Юнайтед". Ривожланиб бораётган ва ўсишга эришаяпти дейилган "Арсенал" уч йилда бирор марта финалда ўйнамади. Шунинг учун одамлар: "Артета соврин ютиш вақти келмадими?" - деб савол бераётганини тўғри тушунаман". 

Шунингдек, Анри Артета қураётган "Арсенал" ҳақидаги диалоглардан бирида усталик билан фикр билдириб кетган. Микель янгидан-янги қаватларни қурмоқда, аммо бу қаватлар соврин билан ҳам тўлдириляптими? Бу фикрда бир томондан тўғридан-тўғри "отилган тош", туҳмат йўқ, лекин Артета мана шу ҳақиқат учун ҳам Тьерридан хафа бўлиши мумкин. Кейинроқ француз ўз позициясини батафсилроқ айтиб, вазиятни юмшатишга уриниб кўрди. Анридан "Арсенал" баҳордаги омадсизликларидан кейин клуб чемпионликка эришишига ишонасизми, деб берилган саволга қуйидагича жавоб берди:

"Назаримда, Артета ўз ишини аъло даражада бажармоқда. Албатта, уни ҳеч қанақасига ҳозир жамоадан кетказиб бўлмайди. Мен янги мавсум "Арсенал"нинг чемпионликка эришишига ишонаманми? Ҳа. Ҳаммаси яхши ва янада яхши бўлиши керак".

Аслида, бир ой фарқ билан айтилган бу икки фикрда глобал фарқ йўқ. Совринлар йўқлиги сабабли Артета ҳақли равишда танқид қилинмоқда. У беш йилдан кўпроқ вақт давомида битта жамоани бошқармоқда. Бу АПЛнинг бой жамоаси учун кўп вақт. Клопп ва Гвардиоладан фарқли ўлароқ, "Арсенал" устози жамоасини евроаренада финалларга олиб чиқа олмади. Лондонликлар раҳбарияти АПЛдаги ғалабадан бошқа бирор мусобақадаги ғалабани нишонлай олмайди. Артетанинг шартномаси 2027 йилгача узайтирилди. Энди америкалик босс ва талабчан мухлислар "Арсенал" мусобақаларда ғолиб бўлишини кўришни исташмоқда.

Кронке лойиҳа ўсишдан тўхтаб қолганини тушуниб турибди

Тасаввур қилинг, сиз "Арсенал" эгасисиз. Зиқна дейиладиган Кронке Артетага трансферлар учун бюджет ажратди. 2020 йил ёзидан буён, айнан ўшанда Микель клубнинг трансферларига тўлиқ таъсир кучига эга бўлган, ундан кўпроқ фақат Манчестер клублари ва "Челси" пул сарфлади. Дьёкерешнинг трансфери миллиард евролик довондан ўтиш имконини беради.

Энди ўзингизни Кронкенинг ўрнига қўйинг ва савол беринг: жамоа айтарли ҳеч қандай соврин ютмаса, Артетани бош мураббийликда қолдириш керакмикин? Тўғри жавоб – йўқ, қолдириш керак эмас. "Тоттенхэм" Постекоглуни Европа Лигасидаги ғалабадан кейин ҳайдаб юборди. "Тоттенхэм" мухлислари ҳам янги мавсумда янги мураббий Франк билан АПЛда чемпионликдан умид қилишмоқда. Клуб ўзи учун катта ишларни қилмоқда ва деярли барча чизиқда сифатли ижрочилар мавжуд.

"Арсенал"нинг пули ундан ҳам кўп, клуб репутацияси эса Салиба, Райс ва Эдегор сингари яхши футболчиларни таркибга жалб қилиш имконини беради. Энди эса бор эътиборни ишга қаратиб, Артетага мавсум давомида нолишни таъқиқлаб қўйиш ва мусобақларнинг қайси бири муҳимлигини аниқлаб олиш қолди. Катта эҳтимол "Арсенал"ни ҳам Чемпионлар Лигаси, ҳам АПЛга кучи етмайди. Бошқа томондан "канонирлар" "Челси" ва "Ман Сити"дан фарқли равишда клублар ўртасидаги жаҳон чемпионатида иштирок этмади, "Ливерпуль" футболчилари эса даҳшатли фожиани бошдан ўтказишди – ака-ука Жоталар автоҳалокати. "Арсенал"нинг имкониятлари йўқ эмас.

Таркибда Гёкереш пайдо бўлиши билан Артета туғма снайпери йўқлиги ҳақида баҳона қила олмайди. Португалия чемпионатининг янги қироли АПЛда ўйнаб кета оладими ёки йўқ, билиб бўлмайди. Роналду ва Брунуни мисол сифатида кўрсатадиганларга, Фалькао ва Жарделни эслатаверишади. "Спортинг" форварди Мадуэке ва Субименди орқали Микелнинг орзусидаги таркибга максимал равишда яқин келинди. Артета футболчиларни ўзи танлади ва бу таркибни анча вақт давомида йиғди.

"Арсенал" дарвозасида ҳозир Кепа ва Райя бор. Бу Премер-лигада ўтган мавсумдаги сейвлар нисбати бўйича биринчи ва учинчи дарвозабонлар. Лазаретдан жангчи ва жамоа етакчиси Габриэль қайтди. Вильям Салиба "Реал" қизиқишига қарамай, ҳозирча Лондонда. Тимбер қанотда Сака билан анча чиқишиб олган, чапда эса ёш Льюис-Скелли бор ва у янги вингер Мадуэкени кутмоқда. Ёз охиригача ҳаттоки Родригони олиб келишга ҳам пул етарли, аммо бразилиялик "Реал"ни тарк этишга шошилмаяпти.

Хавбек Субименди Мадридни эмас, Лондонни танлади ва асосий таркибда Партининг ўрнини эгаллайди. Райс ва Эдегор – жаҳон даражасидаги юлдузлар. Ҳужумда Гёкереш, захирада эса "Челси" ва "Манчестер Сити"нинг собиқ футболчиларини кўриш мумкин. Хаверц рақобатчилардан максимал вақт ютиб олиш учун тер тўкади. Балки Кай ҳужумнинг чап қанотида ҳам ўйнар. Артета таркибига баҳо бериш учун биргина фактни келтириш етарлидек, Европа чемпиони Микель Мерино захирага михланади. Шундай экан, Анри ҳақ – "Арсенал" АПЛда ғолиб бўлиши мумкин. Мавсум совринсиз якунланадиган бўлса, Микель Артетага чиқиш эшиклари кўрсатилиши мантиқий қарор бўлади.