АПЛ. Превью: "Челси"ни олдидан "қора мушуклар" чиқмоқда, Пеп яна италиялик мураббий олдида ожиз қоладими?

Кеча ўтказилган ўйинларда "Борнмут" 27 йиллик танаффусдан сўнг "Лестер" қаршлигини енган бўлса, "Арсенал" Ливерпулда "Эвертон"га ютқазиб қўйди.

Бу эса албатта турнир жадвалида пешқадам бўлиб турган "Челси"га қўл келди. Эндиликда Антонио Конте шогирдлари "Сандерленд"ни меҳмонда таслим этишни уддалай олишса, "аристократлар" "канонирлар"дан 6 очкога узиб кетишади.

Аммо бунга Дэвид Мойес шогирдлари йўл қўйишадими? Гарчи "Сандерленд" жамоаси айни пайтда турнир жадвалида энг охирги ўринни банд этиб турган бўлсада, улар сўнгги ўтказилган бешта учрашувдан учтасини ғалаба билан якунлашди. Бу эса "Сандерленд" ўз ўйинини топиб олганидан дарак беради.
"Сандерленд" учун бу тўқнашувдаги ғалаба нега янада муҳимроқ, деган саволга қуйида жавоб оламиз. Турнир жадвалининг қуйи қисмидан жой олган "Сандерленд"нинг энг яқин "қўшнилари" - "Халл" ва "Суонси" жамоалари бу турда сафарда "Тоттенхэм" ҳамда "Вест Бромвич" меҳмонига айланишади. Агарда бу ўйинда улар мағлубиятга учрайдиган бўлишса, унда "Сандерленд"нинг ғалабаси "қора мушуклар"га хавфли зонани тарк этишларига ёрдам беради.
Лекин "Сандерленд"нинг рақиби пешқадам "Челси" эканлиги "қора мушуклар"ни қўрқитиб юбориши мумкин. Антонио Конте қўл остида кетма-кет 10та учрашувда ғалаба қозонган "аристократлар" "Стэдиум оф Лайт"дан хафа ҳолатда Лондонга қайтишни истамасликлари аниқ.
Дэвид Мойес эса Гвардиола, Моуринью ва Почеттинонинг қўлидан келмаган ишни бажармоқчи. Яъни Контенинг ғояларига қарши ўзининг тактик юришини тайёрлаб қўйгани аниқ. Аммо унинг бу тактик режалари қанчалик иш беришини тунда бўладиган баҳсдан сўнг билиб оламиз.

Ўзаро ўйинлардаги факт:
"Сандерленд" ва "Челси" жамоалари шу кунга қадар барча мусобақаларда жами 123 маротаба дуч келишган. Устунлик "Челси" тарафида. "Аристократлар" ўзаро ўйинларда 60 маротаба ғалаба қозонишган. "Сандерленд" эса 42 бор "Челси"дан устун келган. Қолган 21 учрашувда ғолиб номи аниқланмаган.

Чемпионшипдан қайтиш премьер лигага қайтиш қилган "Мидлсбро" бугун "Риверсайд"да учинчи поғонада бораётган "Ливерпуль"ни қабул қилади. Айтор Каранка қўмондонлик қилаётган "Мидлсбро" мавсумни жуда кўтаринки кайфиятда бошлаганди. Аммо жамоанинг охирги ўйинлардаги натижалари анча пасайиб кетди. Каранко жамоасининг охирги ўтказилган бешта ўйиндан атига биттасида ғалаба қозонгани мухлисларни ҳавотирга қўймоқда. Жамоа эса турнир жадвалида ҳам аста-секин пастламоқда. "Манчестер Сити", "Арсенал" каби жамоалар "Мидлсбро"ни мағлуб этиш чораларини топа олишмаганди. Пешқадам "Челси" эса Каранка бошқарувидаги жамоага қарши ўйинда ягона гол эвазига қимматли 3 очкога эга чиққанди. Юрган Клопп учун Мидлсбродаги сафар осон ўтмаслиги аниқ. Асосан ҳимояда зич ва тартибли ўйнайдиган жамоага қарши ўйинда "Ливерпуль"нинг ҳужумкор услуби қанчалик наф беришини кузатиш қизиқ бўлади. Айтор Каранка эса жамоасини қарши ҳужумда қандай ўйнатишни жуда яхши билади. Юрген Клопп жамоасининг ожизроқ нуқтаси ҳам айнан мудофаа чизиғи ва дарвозабон саналади. Клопп ишонч билдираётган Кариуснинг ишончсиз ўйинлари мерсисайдликлар ҳимоячиларини янада эҳтиёткор бўлиб ўйнашга ундайди. Айни пайтда "Ливерпуль" жамоасида муаммолар етарли. Коутиньонинг жароҳатидан сўнг жамоада самарадорлик анча пасайди. Клопп жамоаси ҳар бир ўйинда бир қатор вазиятлардан яратаётган бўлишсада, уларни голга айлантиришга келганда етарли муаммоларга эгалар.

Чемпионлик учун курашаётган "Ливерпуль" охирги иккита ўйинда бор йўғи 1 очко ишлади. Бу эса Клопп жамоасини анча ғазаблантиргани бор гап. "Ливерпуль" пешқадам "Челси"ни олдинга қўйиб юборди ва чемпионлик пойгасида тезликни анча тушириб юборди. Аммо кеча "Арсенал"нинг қоқилишидан сўнг "Ливерпуль" жамоасининг иштаҳаси янада очилган бўлса ажаб эмас. Агарда "Ливерпуль" жамоаси бугун ғалаба нашидасини сурадиган бўлса, унда мерсисайдликлар иккинчи поғонага қайтишади. Аксинча бўладиган бўлса, унда "Сити"ни ҳам олдинга қўйиб юборишлари мумкин.

Ўзаро ўйинлардаги факт:
"Мидлсбро" ҳамда "Ливерпуль" шу кунгача умумий ҳисобда 143 учрашувда ўзаро баҳслашишган. Шуларнинг 62тасида мерсисайдликларнинг қўллари баланд келган бўлса, 41 ўйин "Мидлсбро"нинг фойдасига тугаган. Қолган 40 учрашувда дуранг натижаси қайд этилган.


Турнир жадвалининг бешинчи поғонасида ўрнашиб олган "Тоттенхэм"нинг ишлари яхши эмас. Маурисио Почеттино шогирдлари ўтган турда асосий рақибларидан бири "Манчестер Юнайтед"га имкониятни бой беришди. Бу турда эса "Уайт Харт Лэйн"да "Тоттенхэм" премьер лигада энг кўп тўп ўтказиб юборган "Халл"ни қабул қилади.
Чемпионатнинг энг яхши ҳимояси ва бу борада ҳозирча энг ёмон кўрсаткичга эга "Халл" ҳимояси ўртасидаги "жанг"да қайси жамоанинг ҳужумчиларига мазза бўлади? Бу саволга кўпчилик шубҳасиз "шпорлар" ҳужум чизиғи кучли, дея жавоб бериши аниқ. Аммо ҳақиқий жавобни тунда бўлиб ўтадиган ўйиндан сўнг оламиз.
"Тоттенхэм" жамоаси охирги бешта ўйиндан фақатгина иккитасида ғалаба қозонишди. Почеттино шогирдлари ўтган уй ўйинида "Суонси"га қақшатқич зарба беришганди.
Майк Феланнинг бундан хабари бор ва жамоани "Тоттенхэм"га қарши ўйинда "Халл"ни бу борада алоҳида режа асосида тайёрлаши аниқ.

Ўзаро ўйинлардаги факт:
Бу жамоалар ҳозирга қадар 29 маротаба дуч келишган. "Тоттенхэм" 13та ўйинда рақибидан устун келган, "Халл" эса 6 учрашувда ғалаба қозонган. Қолган 10та беллашувда эса жамоалар муроса кўчасини танлашган.

Жозе Моуринью бошчилигидаги "Манчестер Юнайтед" ўтган гал ўз уйида "Тоттенхэм"ни таслим этганди. Бу эса уларни кайфиятига яхши томонлама таъсир қилган. Шу боисдан ҳам "қизил иблислар" яхши кайфиятда Лондоннинг жанубий томонида жойлашган Кройдон шаҳрига йўл олишган. "Кристал Пэлас" жорий мавсумда бир текисда ўйнай олмаяпти. Уларнинг эгаллаб турган ўрни ҳам шунга мос равишда. Алан Пардью шогирдлари бу турда очко йўқотишга ҳақлари йўқ. Сабаби, бу турдаги мағлубият уларнинг турнир жадвалидаги мавқеига яхшигина путур етказади. Ҳозирги банд этиб турган 15-ўриндан янада пастламасликлари учун камида "Манчестер Юнайтед"дан очко олишлари лозим бўлади. "Кристал Пэлас" кўп гол уриши мумкин, аммо ўз дарвозасидан ҳам мунтазам тарзда гол қўйиб юборадиган жамоалар сирасига киради. Яъни Алан Пардью жамоасининг мудофаа чизиғи мақтанарли даражада эмас. "Бургутлар" ушбу мавсумда ҳозирга қадар ўтказилган 15та ўйиндан атига биттасида ўз дарвозаларини қуруқ сақлашни уддасидан чиқишган.
"Кристал Пэлас"нинг асосий қуроли бу албатта ҳужум. Жамоа ҳар қандай вазиятда ҳужум қилишга ва шу орқали ҳимоядаги кемтикларни ўрнини тўлдиришга уринади. Жамоа етакчилари бу албатта Кристиан Бентеке ва Уилфрид Заа ҳисобланади. "Бургутлар"нинг ўйини асосан шу футболчиларга боғлиқ.

Жозе Моуринью ниҳоят Генрих Мхитарянга имконият беришни бошлаганида арманистонлик футболчи жароҳат олди ва сафдан чиқди. "Манчестер Юнайтед"нинг премьер лигадаги узоқ кутилган ва асосий рақиби устидан қозонилган ғалабасига бош сабабчи бўлган Генрих Мхитарян айнан "Тоттенхэм" билан бўлган беллашувда оёғини шикастлаб олганди. Бу учрашувда эса "Манчестер Юнайтед"нинг янги етакчиси "қизил иблислар"га кўмаклаша олмайди.
Бу албатта ҳозирнинг "Манчестер Юнайтед" учун яхшигина йўқотиш саналади.
Моуринью жамоаси учун бу тўқнашувда қўлга киритиладиган уч очко жуда муҳим. Акс ҳолда Юнайтед бешинчи ўринда бораётган "шпорлар"ни яна узоққа қўйиб юборади.

Ўзаро ўйинлардаги факт:
"Бургутлар" ва "Қизил иблислар"нинг ўзаро ўйинлари тарихига назар соладиган бўлсак, унда катта устунлик Манчестер жамоаси тарафида. "Юнайтед" ўтказилган 49та ўйиндан 32тасида ғолиб бўлган. "КРистал Пэлас" эса 7 бор зафар қучган. Қолган 10 учрашувда эса ғолиб номи аниқланмаган.

Хосеп Гвардиола бошқарувидаги "Манчестер Сити" "Лестер" томонидан тор-мор этилгач ўзига келиб олганми ёки йўқ, деган саволга бугунги "Уотфорд"га қарши кечадиган ўйинидан сўнг билиб оламиз.
"Этиҳад" стадионида бўлиб ўтадиган баҳсда "Сити"ни фақатгина ғалаба қаноатлантиради. Пеп шоигрдлари сўнгги иккита ўйинда мағлубиятга учрашгани ва ғалабасиз ўйинлари сони ЕЧЛни ҳам қўшганда учтага етганини ҳисобга оладиган бўлсак, маҳаллий ишқибозларни бошқача натижа умуман қониқтирмайди. Акс ҳолда жамоа бош мураббийи Гвардиола қаттиқ танқидлар остида қолиб кетади. Чемпионлик пойгасидан тобора узоқлашиб кетаётган "Сити"га бу сафар ҳам яна итальянча мураббий тактикасида ўйнайдиган "Уотфорд" қаршилик қилади. Аввалига Конте, кейин Раньеридан "тарсаки" еган Гвардиолани Маццари олдида қандай чора кўришини томоша қилиш қизиқ бўлиши шубҳасиз.
Маццари шогирдлари ҳозирча премьер лигада ёмон иштирок этишмаяпти. Фақатгина жамоа охирги ўйинларда бироз тезликни тушириб юборганини ҳисобга олмаса, қолган ишлар яхши кетмоқда. Турнир жадвалининг қоқ марказидан жой олган "Уотфорд" еврокубоклар учун бериладиган йўлланмалар учун курашиб кўришига ҳеч нима тўсқинлиқ қила олмайди. Фақатгина бунга жамоанинг муваффақиятсиз ўйинлари сабаб бўлиши мумкин.

Ўзаро ўйинлардаги факт:
Бу жамоаларнинг ўзаро ўйинлари сони 21тани ташкил қилади. Шулардан 10тасида "шаҳарликлар"нинг қўли баланд келган, 6та учрашувда эса "Уотфорд" ғалаба қозонган. Қолган бешта ўйинда дуранг қайд этилган.


Лондоннинг яна бир бурчагида "Вест Хэм" жамоаси ўзидан тўрт поғона тепада турган "Бёрнли"га қарши ўтказади.
"Арсенал"дан учралган йирик мағлубият ва "Ливерпуль" билан эришилган дурангдан сўнг Славен Билич жамоани керакли йўналишда тайёрлай олиши лозим. "Энфильд"даги натижадан сўнг жамоанинг ўз кучига бўлган ишончи ортгани ҳам аниқ. Аммо "Бернли" кўп жамоаларга чақилмас ёнғоқ бўлиб келади.
"Вест Хэм" турнир жадвалида "Бернли"га яқинлашиб олиши қулай имкониятга эга. Буёғи эса ўзларига боғлиқ. Билич ва Дичнинг қарама-қаршили анча томошабоп ўйинни тақдим этиш эҳтимоли юқори.

Ўзаро ўйинлардаги факт:
Ушбу жамоалар 82 маротаба дуч келишган. Шулардан 34тасида лондонликлар ғалабага эришишган. Шунингдек яна 31та учрашувда "Бернли"нинг қўли баланд келди. Қолган 17 баҳс эса дуранг натижаси билан якун топган.


Турнир жадвалидаги ёнма-ён "қўшнилар" "Сток Сити" ва "Саутгэмптон" жамоалари ушбу турда ўзаро рўбаро келишади. "Сток Сити" ўз уйида бўладиган ўйинда "Саутгэмптон"ни мағлуб этиб, турнир жадвалида уларни қувиб ўтиш имкониятига эга.

Ўзаро ўйинлардаги факт:
Бу жамоалар шу кунгача жами 70 учрашувда ўзаро куч синашишган. Буларнинг 27тасида "Сток Сити"нинг қўли баланд келган бўлса, 30 ўйинда "Саутгэмптон" ғалаба қозонган. Яна 13та беллашув дуранг билан тугаган.


Жадвалнинг қуйи қисмидан жой олган яна бир жамоа бу "Суонси". Бугун "оқ қушлар"ни "Вест Бромвич" жамоаси ўз майдонида синовдан ўтказади. Мавсумни ўртача ўтаказаётган "Вест Бромвич" қаршилигида қўзи қонга тўлган "Суонси". Ўтган турдаги ғалабадан сўнг "Суонси"нинг шашти анча баланд. Боб Брэдли шогирдларининг асосий вазифаси турнир жадвалида хавфли зонани тезроқ тарк этиш. Бунинг учун эса улар сафарда "Вест Бромвич"ни таслим этишлари керак бўлади.

Ўзаро ўйинлардаги факт:
"Вест Бромвич" ҳамда "Суонси" жамоалари шу кунга қадар 32 маротаба ўзаро дуч келишган. Бу қарама-қаршиликда устунлик "Суонси" тарафида. Улар 14 бор ғалаба нашидасини суришган. "Вест Бромвич" эса 12 марта ютуққа эришган. Қолган 6 ўйинда ғолиб жамоа номи аниқланмаган.


АПЛ, 16-тур.

Вест Хэм – Бернли

«Олимпийский стадион»

Бош ҳакам: Роберт Мадлей.


Сандерленд – Челси

«Стэдиум оф Лайт»

Бош ҳакам: Ниль Сварбрик.
 


Мидлсбро – Ливерпуль

«Риверсайд»

Бош ҳакам: Жон Мосс.


Сток Сити – Саутгемптон

«Бет365 Стэдиум»

Бош ҳакам: Антони Тэйлор.


Манчестер Сити – Уотфорд

«Этихад Стэдиум»

Бош ҳакам: Кевин Фрэнд.



Вест Бромвич – Суонси

«Хоторнс»

Бош ҳакам: Майкл Оливер.


Тоттенхэм – Халл

«Уайт Харт Лейн»

Бош ҳакам: Андре Марринер.


Кристал Пэлас – Манчестер Юнайтед

«Селхерст Парк»

Бош ҳакам: Крейг Павсон.

Сайтимизнинг Instagram даги саҳифаси - instagram.com/championat.asia

Сайтимизнинг Telegram даги каналига обуна бўлинг - telegram.me/championatasia