Анвар Бердиев бутсаларини михга илди

41 ёшли Бердиев жорий мавсум ҳам яшил майдонда кўриниш бераётганди. У ПРО-Лига вакили “Истиқлол” жамоаси шарафини ҳимоя қилиб келаётганди. Мавсумнинг биринчи қисми якунига етгач, Анвар Бердиев бутсаларини михга илишга қарор қилди. Сабаби унга “Истиқлол” раҳбарияти томонидан мураббийлар штабига ўтиш таклифи бўлганди. Собиқ ҳужумчи ҳеч иккиланиб ўтирмасдан, миллионлар ўйинидаги янги саҳифасини очишни маъқул топди.

Чунки “Истиқлол”ни Бердиевга яхши таниш бўлган Сергей Лебедев бошқариб келаётганидан хабарингиз бор. Ушбу собиқ футболчилар ўз вақтида “Нефтчи” жамоасининг олтин даврларида яшил майдонда бирга харакат қилишганди. Шу боис бўлса керак, Лебедев ҳам мураббий сифатида ёнида Бердиевдек собиқ футболчининг борлиги зарар қилмаслигини тушуниб етган. Бунгача Сергей Элфератовичга мураббийлар штабида дарвозабонлар устози Баҳодир Шамшиддиновнинг бир ўзи ёрдам бериб келаётганди. Эндиликда уларнинг қаторига Бердиев ҳам қўшилди. Айтиш лозимки, Анвар Бердиев “С” мураббийлик лицензиясига эга.