Андрей Фёдоров: "Ўйин биз кутган сценарий остида ўтди"

- Ўйин биз кутган сценарий остида ўтди. Учрашув мухлисларга, мураббийларга ёқди, деб ўйлайман. Натижа туфайлигина баҳс "Бунёдкор" бош мураббийига ёқмади шекилли. Учрашув ўз статусига муносиб бўлди. Чунки иккита яхши шаклланган жамоалар бугун чиройли футбол кўрсатишди. Қийин беллашувдаги муҳим ғалабадан тўла қониқдим. Биз ҳам, "Бунёдкор" ҳам етарлича хавфли вазиятлар яратишди. Якунда эса омад бизга кулиб боқди. Ўтказиб юборилган голдан кейин футболчилар ўзларида куч топишди ва иродали ғалабани қўлга киритишди. Уларга фақатгина мақтовли сўзларни йўллайман.

Ким бош мураббий? Айни пайтда мен вақтинча бош мураббий вазифасини бажаряпман. Аввалги матбуот анжуманида ҳам бу саволга жавоб бергандим. Ҳамма қарорларни мен чиқараман. Шунингдек, мураббийлар штаби билан ҳам маслаҳатлашаман. Мирко Йеличични жамоада ишлаётгани менга ҳеч қандай халақит қилаётгани йўқ. Аксинча, унинг кўмаги бизга ёрдам беради.

Марат Бикмаев: "Иккита ҳужумкор жамоа ўртасидаги баҳс ҳақиқий шиддатли футболга айланди. Шундай ўйинлар кўп бўлса жуда катта фойда бўларди. Бу каби баҳслар мухлисларга ёқади. Одатда жамоалар бизга қарши ҳимоявий ўйнайди, аммо "Бунёдкор" ҳужумкор ўйнади. Натижада стадионга келган мухлислар ажойиб футбол гувоҳига айланишди. Ўйин шахсан менга жуда ёқди. "Бунёдкор" ҳам, биз ҳам кўплаб вазиятлар яратдик. Таблодаги ҳисоб эса тўлиқ адолатдан.

Иккинчи пенальтида аниқ контакт бўлди ва "нуқта" ҳақли кўрсатилди. Тўпни дарвозага тепмоқчи бўлган пайтим Анвар Ғофуров мени оёғимга тегди. Бу вазият жарима майдончаси ичида бўлдими ёки ташқаридами, буни билмадим. Бу вазиятни фақатгина такрорий лавҳада кўрсам қаерда йиқилганимни биламан. Мен у вазиятда буни аниқ англолмасдим. Мен ҳеч қачон пенальти ишлаш учун симулация ишлатмаганман. Ёки кўргансизми мени симулация қилганимни? Мен ундай футболчилар сирасига кирмайман. Мени бир ўзим пенальтини ўйлаб тополмасдим.