Андрей Деркач: «Қизилқум» жамоасига нафим тегса бундан хурсанд бўламан»
16 май 2016 17:25
Янгиликлар

Андрей Деркач: «Қизилқум» жамоасига нафим тегса бундан хурсанд бўламан»

Олий лига тўққизинчи туридан жой олган «Қизилқум» — «Андижон» жамоалари (2:1) учрашувидан сўнг, мезбонларнинг украиналик легионери Андрей Деркач ўйин ҳақида ўз фикрларини билдирди.

—Охирги икки турдаги омадсизликдан сўнг, мухлисларимизга ғалаба тақдим қилганимиздан жуда мамнунмиз, — дейди Андрей Деркач. — «Андижон» — чемпионатнинг шаклланган ва кучли жамоаларидан бири саналади. Ўтган йилги мавсумда бу жамоани Навоийда 1:0 ҳисобида мағлубиятга учратгандик. Ўшанда менинг киритган ягона голим кончиларга муҳим уч очкони туҳфа қилганди.

Бу галги учрашувда кутилмаганда жамоадошим Георгий Квесиешвили ўз дарвозамизни ишғол этиб қўйди. Автоголдан ҳеч ким кафолатланмаган. Шу боис, биз саросимага тушиб қолмадик. Орадан кўп ўтмай, рақиб дарвозасига тўп киритиб, ҳисобни тенглаштирдим. Бундан руҳланиб олти дақиқа ўтар-ўтмасдан ҳисобда олдинга чиқиб олдик. Мухлисларни ғалаба билан табриклайман.

Навоийда аҳил ва иноқ жамоа шаклланган. Бу ердаги шарт-шароитлар ва мухлисларнинг фаоллиги бизни фақат ғалаба сари ундаяпти. Бир неча йилдирки, «Қизилқум» жамоаси таркибида ўйнаяпман. Жамоамга нафим тегса, бундан фақат хурсанд бўламан.

«Қизилқум» ПФК Матбуот хизмати.