"Андижон" жамоаси Андижон вилояти ҳокими билан учрашди

Учрашув Андижон шаҳридаги ихтисослаштирилган футбол мактаб интернатида бўлиб ўтди. Андижон вилояти ҳокими учрашув чоғида “Андижон” жамоаси учун керакли барча ёрдамларни беришини ва бундан кейин муаммолар бўлмаслигини айтиб ўтди. Шуни айтиб ўтиш керакки, вилоятимиз ҳокими ташаббуси билан “Соғлом авлод” стадионининг ечиниш-кийиниш хонасида таъмирлаш ишлари олиб борилди ва айни пайтда якунланиш арафасида.

Чемпионатнинг 5-турида, 18 апрель куни “Андижон” жамоаси ўз майдонида “Бухоро”ни қабул қилади. Шу куни “Соғлом авлод” стадионида чемпионатнинг очилиш учрашуви бўлади. 18 апрелга қадар стадионда барча ишлар якунланади. Бундан ташқари Ш.Абдураҳмонов “Андижон” клуби қошидаги Бўстон даҳасида жойлашган футбол мактаби майдонларининг сифатини яхшилаб, бемалол машғулот ўтказиш имкониятини яратиб беришини ҳам таъкидлади. Шу билан бирга вилоятимиз ҳокими жамоани молиявий қўллаб-қувватлаб боришини ҳам маълум қилди. Бунга жавобан “Андижон” жамоаси чемпионатда яхши натижалар қайд этиб, мухлисларни хурсанд этишини Ш.Абдураҳмонов сўзининг охирида айтиб ўтди.

Учрашув давомида “Андижон” жамоаси сардори Расул Раҳмонов сўзга чиқиб, жамоага вилоят ҳокимлиги томонидан берилаётган ёрдам учун миннатдорчилик билдирди ва бунга жавобан яхши натижалар кўрсатишга ваъда берди.

Эслатиб ўтамиз, “Андижон” жамоамиз чемпионатда шу кунгача ўтган 4та турнинг барчасини сафарда ўтказди ва бу ўйинларда бир очкони қўлга киритди. 18 апрель куни эса жамоамиз ўз майдонидаги дастлабки учрашувни “Бухоро”га қарши ўтказади.

“Андижон” клуби матбуот хизмати.