"Андижон" водий дербисида аср ғалабасини қўлга киритадими? "Насаф" қаршисида ноқулай рақиб, "Динамо" стартда яна "Навбаҳор" меҳмони

Дастлабки турларда жамоаларнинг имкониятлари тенглиги, ҳали тўлиқ ритмга тушиб олмагани ўйинларнинг муросасиз ўтишини таъминлайди. Биз мазкур тур олдидан бир қатор қизиқарли фактларга юзланамиз. 

ОКМК - "Бухоро"

- "Бухоро" Суперлига доирасида сўнгги бор 2016 йил Олмалиқда ОКМКни мағлуб этган. 

- ОКМК охирги маротаба рақибига 2019 йил сафарда имкониятни бой берган.

- Жамоалар ўртасидаги охирги 5 та ўйинда дарвозаларга мунтазам гол уриб келинган. 

- Улуғбек Бакаев мураббий сифатида охирги мартта 2021 "Сўғдиёна" бошқарувида ОКМКни таслим қилган.

"Қизилқум" - "Сурхон"

- Термиз клуби 5 йилдан буён "Қизилқум" майдонидан ғалабасиз қайтмоқда. "Сурхон"нинг сафардаги сўнгги 3 очкоси 2020 йилги мавсумда қўлга киритилган. 

- "Сурхон" 3 йилдан буён Суперлигани ғалабасиз бошламоқда. Жамоа сўнгги бор 2021 йил мавсумнинг илк турида "Металлург"га қарши ўйинда ютуқни тантана қилган. 

"Қўқон-1912" - "Андижон"

- "Андижон" сўнгги бор Суперлигада "Қўқон-1912"ни 2003 йилда мағлуб этишни уддасидан чиққан. Кейинги 10 та тўқнашувнинг 6 таси қўқонликлар фойдасига ҳал бўлган, 4 та ўйинда томонлар муроса кўчасини танлашган.

- "Бургутлар" шу пайтгача рақибини сафарда бир бор енгган. Жамоанинг ягона ғалабаси 1998 йилги мавсумда қайд этилган (6:0). Жамоа 21-асрда ҳали Қўқонда зафар қучмаган.

- Икки жамоа 3 йилдан сўнг яна Суперлигада учрашмоқда. Улар охирги маротаба 2021 йил Қўқонда тўқнаш келган ва дурангга имзо чекишган. 

- "Андижон" Суперлигага қайтганидан буён мавсумни мағлубиятсиз бошламоқда. Александр Хомяков шогирдлари 2023 йил Қаршида "Насаф"дан устун келган бўлса, 2024 йил Олмалиқда ОКМКдан бир очко олиб қайтган. 

- "Қўқон-1912" икки йиллик танаффусдан сўнг Суперлигада иштирокини бошлайди. 

"Бунёдкор" - "Нефтчи"

- Фарғоналиклар кетма-кет 3 мавсумдан буён Суперлиганинг 1-турида 3 очкога эга чиқмоқда. 2022 йил "Қўқон-1912" (1:0), 2023 йил "Металлург" (3:0), 2024 йил "Сўғдиёна" (2:1) устидан ғалаба қўлга киритилган.

- "Бунёдкор" сўнгги маротаба 2023 йил "Нефтчи"дан устун келган эди. Ўтган мавсумдаги 2 та ўйинда ҳам фарғоналикларнинг қўли баланд келган (3:0, 2:1).

"Хоразм" - "Шўртан"

- Жамоалар 15 йилдан сўнг яна Суперлигада тўқнаш келади. Ўзаро ўйинлардаги сўнгги баҳс 2010 йилги мавсумга тўғри келади. Ўшанда ғузорликлар 4:1 ҳисобида ғалаба қозонган.

- "Хоразм" Суперлигада ҳали "Шўртан"ни мағлуб этмаган, 6 та ўйин 2 та дуранг, 4 мағлубият. 

- "Хоразм" элитада 15 йилдан кейин тўп тепади. Жамоа 2010 йил Про лигага (Биринчи лига) тушиб кетганидан сўнг ҳали Суперлигада иштирок этмаган. 

- "Шўртан" 7 йиллик танаффусдан сўнг яна Суперлигада ўйнайди.

"Навбаҳор" - "Динамо"

- "Динамо" бу турда тарихий ғалабани нишонлаши мумкин. Самарқандликлар Суперлига доирасида ҳали меҳмонда "Навбаҳор"ни мағлубиятга учрата олмаган, 26 та ўйин 20 мағлубият, 6 дуранг. 

- "Лочинлар" сўнгги бор 2014 йил ўз майдонида очко йўқотган. Ўша ўйин 2:2 ҳисобидаги дуранг билан якунланган.

- "Динамо"га 10 йилдан бери "Навбаҳор"ни ютиш насиб қилаётгани йўқ, Самарқанд жамоаси 2015 йил ўз майдонида 3 очколик бўлган (2:1).

"Насаф" - "Сўғдиёна"

- "Сўғдиёна" кетма-кет 4 йилдан буён Қаршидан очко билан қайтмоқда. "Насаф" ўз майдонида 2020 йилдан буён рақибини мағлубиятга учрата олмаяпти.

- Бердиев ва Бошкович қарама-қаршилигида устунлик черногориялик мураббий томонида. "Сўғдиёна" устозида 2 та ғалаба, 2 та дуранг ва 1 мағлубият бор. 

- "Аждарлар" ўзаро учрашувларда сўнгги бор 2023 йил жиззахликлар устидан ютуқни тантана қилган (2:1).