"Ал Ҳилол" - "Пахтакор": ўйинга оид маълумотлар

Учрашувга оид турли маълумотлар билан сизларни таништириб ўтамиз.
 
Тайёргарлик
Жамоамиз ўйинга тайёргарликни фақат машғулотлар ёрдамида олиб борди. Таркибда йўқотишлар йўқ. Душанба ва сешанба куни машғулот Ар-Риёдда ўтказилади. Пайшанба куни тикланиш машқларини бажарган Нўъмон Ҳасанов шогирдлари кейинги кунлари бевосита ўйинга қаратилган машғулотда иштирок этишди.
"Ал Ҳилол" эса шанба куни Саудия Арабистони чемпионатининг 18-турида ўз майдонида ашаддий рақиби "Ал Иттиҳод"га қарши майдонга тушди. Тўпни назорат қилишда деярли 3 баравар устунликка эга бўлган Георгис Донис шогирдлари буни натижада акс эттира олмай, 0:1 ҳисобида мағлубиятга учради. Жамоа 40 очко тўплаб, таъқибчиларини бир очкога ортда қолдирмоқда. Ўйинни "Ҳилол" қуйидаги таркибда ўтказди:
Шараҳили,  Зори, Квак, Жаҳфали, Шаҳрони, Отайф (Аилтон), Салман, Шалҳуб (Қаҳтони), Салим, Эдуардо, Шамрони (Давсари).
 
Ўзаро ўйинлар
Саудия Арабистонида жамоалар 2 бор тўқнаш келган. Ҳар икки сафар "Ҳилол" 2:0 ҳисобида зафар қучган. "Пахтакор" ўзбек клублари орасида Саудиядан ғалаба билан қайтган ягона жамоа бўлиб турибди. 2009 йил жамоамиз нимчорак финалад Даммамда "Иттифоқ"дан 2:1 ҳисобида устун келган.
 
Стадион ва ўйин вақти
Учрашув Ар-Риёд шаҳрида жойлашган "Шаҳзода Файсал Бин Фаҳд" стадионида 2 март куни Тошкент вақти билан соат 22:30да бошланади. "Пахтакор" ўтган мавсум шу стадионда "Шабаб" билан 2:2 ҳисобида дуранг ўйнаганди.
 
Жамоа душанба куни тонгда Тошкент-Дубай-Риёд йўналишида Саудия Арабистони қироллигига йўл олади.