Аҳмедов "Анжи"да қолади

"Краснодар" клубининг жиддий қизиқишига қарамай, "Анжи" Аҳмедовни сотишдан бош тортди. "Краснодар" мавсум бошидаёқ футболчимизни қўлга киритишни мақсад қилганди. У пайтлар ҳали "Анжи"да футболчиларни оммавий сотиш бошланмаган, барчаси бир маромда кетаётган эди. Кейин "Анжи"да сиёсат ўзгарди. Шунга қарамай, Аҳмедовни клуб қўйиб юбормади. Куни кеча Траоре ва Жусилей жамоани тарк этдилар, аммо Аҳмедовга келган совчиларни яна ортга қайтардилар. Албатта, Аҳмедовнинг клуб раҳбарияти олдида қозонган ҳурмати бизни қувонтиради. Аммо клубнинг бугунги кундаги ҳолатидан келиб чиқиб унда руҳий зўриқишни кўряпмиз. Умид қиламиз, янги йил ҳам "Анжи", ҳам Аҳмедов учун омадли келади.

Айни пайтда Аҳмедов "Анжи" сафида Туркия йиғинида иштирок этяпти. Жароҳати боис якка тартибда машғулот ўтказмоқда. Шифокорларнинг маълум қилишича, у 2 ҳафта ичида умумий гуруҳга қўшилади. Маълумотларга кўра, мураббий ва футболчилар уни янги мавсум сардори сифатида эълон қилганлар.