Абдуллоҳ Олимов: "Андижон"ни Суперлигада олиб қолиш учун бор кучимизни ишга соламиз"

"Навбаҳор" билан кечган "водий дербиси"дан сўнг ушбу футболчига айрим саволлар билан юзландик ва бўлажак ўйинлар ҳақидаги фикри билан қизиқдик.

- "Андижон" жамоасини 16-тур доирасидаги навбатдаги учрашувини "Навбаҳор" жамоасига қарши ўтказди. Ушбу учрашув ҳақида нима дея оласиз?
- Албатта бугунги ўйин қийин ва муросасиз кечишини билар эдик, чунки "Навбаҳор" жамоаси ҳам икки ўйиндан буён ғалаба қозона олмаётган эди. Бугунги ўйинга бор эътибориларини қаратишини кутган эдик.

- Водий дербисидаги дуранг натижа "Андижон" жамоаси учун қанчалик муҳим бўлди?
- Биз учун ҳозирги ҳолатдан келиб чиқиб айтадиган бўлсам ҳар бир очко муҳим ҳисобланади. "Андижон" жамоасини Суперлигада олиб қолиш учун бор кучимизни сарфлаб очколарни йиғишимиз керак бўлади.

- Сиз иккинчи даврадан бошлаб "Андижон" жамоасини сардор сифатида олиб тушмоқдасиз, бу қанчалик масъулият талаб этмоқда.
- Жамоа сардори бўлиб майдонга тушиш жуда кўп масъулият юкалайди, мураббийлар ва футболчилар сардорлик боғичини менга ишониб топширишди ва мен бу ишончни оқлашга ҳаракат қиламан. Футболчилар руҳий томондан тушкун кайфиятга тушиб қолмаслик учун ҳар бир баҳсда ўзларига ишонишлари ҳақида гапириб келмоқдаман.

- "Андижон" жамоаси кейинги турда турнир жадвалида ёнма-ён бораётган "Бухоро" жамоасини қабул қилади, жамоа чемпионатдаги дастлабки уч очкосини қўлга кирита оладими?
- Биз ҳозир ҳар бир ўйинга ғалаба қозониш учун чиқишга ҳаракат қиляпмиз, чунки жамоамиз Суперлигада ҳали ғалаба қозонмади. Насиб бўлса кейинги турда бўлиб ўтадиган "Бухоро" жамоасига қарши ўйинда уч очко олиш учун ўйнаймиз.

Нодирбек Абдуллаев суҳбатлашди