Фарғона вилояти футбол клублари ўртасида ҳамкорлик меморандуми имзоланди

Учрашувда "Нефтчи" футбол академияси, шунингдек футбол клублари ўртасида ҳамкорлик меморандуми имзоланди.

Жараёнда Фарғона футбол ассоциацияси биринчи вице-президенти Носир Отақўзиев, Фарғона давлат университети ректори, "ФарДУ" футбол клуби президенти Баҳодиржон Шермуҳаммадов, "Нефтчи" футбол академияси директори Игорь Химич, шунингдек, "Цементчи" ва "Яйпан" клублари раҳбарияти вакиллари иштирок этдилар.

Меморандумдан кўзланган мақсад вилоятда футболни ривожлантириш, футбол бирдамлигини ошириш, ўзаро тажриба алмашиш, мусобақалар ташкилотчилиги, мураббийлар малакасини ошириш билан боғлиқ масалаларни ўз ичига олади. Вилоят футбол ассоциацияси биринчи вице-президенти Носир Отақўзиев вилоятда футболни ривожлантириш, айниқса, терма жамоаларга фойда келтирадиган иқтидорли футболчиларни тарбиялаб етказиб бериш, футбол клубларини тизимли равишда шакллантириш муҳим эканлигини эътироф этди.

"Сўнгги йилларда Янги Ўзбекистонда футбол спорт турига бўлган эътибор сезиларли даражада кучайди" - дейди Фарғона давлат университети ректори, "ФарДУ" футбол клуби президенти Баҳодиржон Шермуҳаммадов. "Биз университет қошида "ФарДУ" клубини ташкил этганимизда Республикамиз ва вилоятимиз футбол тизимидаги барча мутасаддилар бизни бевосита қўллаб-қувватлашди. Мана ҳозирда Фарғона давлат университетида футбол спорт тури бўйича алоҳида таълим йўналишини очдик. "ФарДУ" футбол клуби спорт тамойилларига асосланган ҳолда қисқа фурсат ичида босқичма-босқич Ўзбекистон Про-лигасига қадар етиб келди. Мақсадимиз, келгусида университет футбол жамоасини Суперлига даражасига олиб чиқиш, халқаро майдонларда иштирок этишга қаратилган. Буларнинг барчаси университетда таҳсил олаётган талаба-ёшлар учун. Бугун имзоланган ҳамкорлик меморандуми вилоят футбол клублари ўртасидаги аҳилликни янада мустаҳкамлайди", – деди олийгоҳ ректори.

Шунингдек, жараён давомида сўзга чиққан "Нефтчи" футбол академияси директори Игорь Химич, шунингдек, "Цементчи" ва "Яйпан" клублари раҳбарияти вакиллари вилоятда футболни тизимли тарзда ривожлантириш учун шу каби ҳамкорлик дастурлари муҳим эканлигини таъкидладилар. Ўз навбатида, учрашув давомида вилоят футболига оид қатор масалалар ҳам кўриб чиқилди.

Бекзод Толибов, Фарғона шаҳридан Championat.asia учун махсус