29 йилда илк бор. Бугун "Пахтакор" "Спартак" билан ўйнайди. Championat.asia баҳсни Москвадан ёритади

Бироз аввал "шерлар" Россия пойтахтига етиб келишди. Аэропортда "Пахтакор" бош мураббийи Шота Арвеладзедан дастхат олганлар ҳам бўлди. 

"Пахтакор" Москвага 18 нафар футболчи билан ташриф буюрди. Элдор Суюнов, Егор Кримец, Умар Эшмуродов, Аброр Исмоилов ва Игорь Сергеев Ўзбекистон миллий терма жамоаси сафида БААда ўтаётган йиғинга йўл олишган. Улар "Спартак" билан баҳсда иштирок этишмайди. Шунингдек, жароҳатдан тикланаётган Акром Комилов, Жавоҳир Сидиқов ва Садриддин Абдуллаев ҳам Москвага ташриф буюришмади.

Дарвозабонлар
Санжар Қувватов
Умид Ҳамроев

Ҳимоячилар
Анзур Исмоилов
Фарруҳ Сайфиев
Алишер Салимов
Владимир Козак
Шерзод Аъзамов
Ҳожиакбар Алижонов

Ярим ҳимоячилар
Асад Собиржонов
Диёр Холматов
Сардор Собирхўжаев
Ҳумоюнмирзо Иминов
Одил Ҳамробеков
Достонбек Ҳамдамов
Жалолиддин Машарипов
Драган Черан

Ҳужумчилар
Эрен Дердийок
Шоҳруҳ Маҳмудҳожиев

Сўнгги бор "Пахтакор" “Спартак” билан 1991 йил 19 октябрь куни СССР чемпионати доирасида тўқнаш келиб, Андрей Пятницкийнинг ягона голи эвазига ғалаба қозонган эди. 29 йиллик танаффусдан кейин жамоалар бугун Москвада майдонга тушишади.

Расмий ўйинлар тоифасида “Пахтакор” москваликлар билан 47 бор учрашув ўтказган. Уларнинг 8тасида “Шерлар” ғалабага эришган бўлса, 18 бор томонлар дуранг натижа қайд этишган. 21 марта “Спартак” зафар қучган. “Пахтакор” рақиб дарвозасига 43 тўп киритган бўлса, Москва жамоаси 78 бор гол уришни уддалаган. “Спартак” ўз тарихида 12 бор СССР чемпионати, 10 марта СССР Кубоги, 10 марта Россия чемпионати ва 3 бор Россия Кубогини қўлга киритган. Айни пайтда жамоани германиялик мутахассис Доменико Тедеско бошқармоқда. "Спартак" сафида бугунги кунда 2014 йилги Жаҳон чемпиони Андре Шюррле, шунингдек Лоренсо Мельгарехо, Роман Зобнин, Георгий Жикия, Жордан Ларссон, Александр Соболев каби машҳур футболчилар тўп тепишмоқда.

"Окритие Арена"да бўлиб ўтадиган ўйинни Россиянинг "Матч ТВ" телеканали тўғридан-тўғри эфирда намойиш этади. Ўйин Москва вақти билан соат 14:00да, Тошкент вақти билан эса 16:00да бошланади.

22.02.2020 йил соат 14.00 (02:00)да “Спартак“ — “Пахтакор“ учрашуви олдидан 1991 йилни ёд оламиз!        

Ўйинни ёритиш мақсадида Нарзулла Сайдуллаев ва Жаҳонгир Файзуллаев 22 февраль куни тушда Москвага етиб келди. Насиб қилса "Спартак" - "Пахтакор" учрашувини championat.asia сайти тўлақонли ёритиб боради.