Ёзнинг кутил(аёт)ган ёрқин трансферлари

Воқеалар ривожида кескин бурулишлар рўй бермаганида футбол мухлиси топ чемпионатларни якунлаб, "кўҳна қитьа" биринчилигига тайёргарлик кўраётган бўларди. Клубларнинг кейинги мавсум учун режалари ва трансфер сиёсатининг қандай кўриниш олишини тахминий сурьатда чизиб кўрсатиш мумкин эди. Айни дамда барча-барчаси мавҳумлигича қолмоқда: турнирларнинг қачон якунланиши, келаси мавсумлар стартининг қанчага кечикиши, трансфер дарчаси, жамоалар ва футболчилар ўртасидаги шартномалар бўйича пайдо бўлиши кутилаётган катта келишмовчиликлар ечими...

Йил аввалида ўзбек футболи ихлосмандлари ҳам трансфер ойнасининг ёзги мавсумини катта иштиёқ билан кута бошлади. Чунки жорий ёз (катта эҳтимол билан) биз учун ҳам Европа томон йўл очиши керак эди. Ниҳоят, А Серия, Бундеслига ёки АПЛда ҳам вакилларимиз пайдо бўлишига ишонч ҳар доимгидан юксала бошлади. Ҳозир (қачон бошланиши ҳам ноъмалум бўлган) ёзги трансфер мавсумининг кутилган ва кутилаётган баъзи ёрқин ўтишлари ҳақида гаплашамиз.

Бу ўринда сўнгги йилларда гапирилаверганидан энсани қотирадиган даражага келиб қолган Неймар ёки Погба типидаги футболчиларнинг эҳтимолий трансферини четлаб ўтишни лозим билдик.

Алексей Миранчук

Ҳозирги клуби: "Локомотив" (Москва)

Трансфер нархи ("Transfermarkt" порталига кўра): 14,5 млн евро

Даъвогарлар: "Ювентус", "Барселона", "Милан", "Севилья", "Рома", "Зенит"

Алексей РПЛ даражасидан ўсганига анча бўлди. ЕЧЛнинг жорий мавсумида "Ювентус" дарвозасига урган голидан сўнг унинг топ чемпионатларга йўл олиши деярли аниқлашганди. Жумладан, "кекса синьора"нинг ўзи россиялик футболчига жиддий тарзда қизиқа бошлади. Пандемия шароитида Миранчукнинг трансфер баҳоси пастлаганига (14,5 млн) қарамасдан, "темирйўлчилар" хавбек учун катта сумма сўрашда давом этяпти. Миранчукнинг агенти Паулу Барбозанинг таъкидлашича, мижози учун камида 40 миллион евро талаб қилинади. Ҳозир молиявий инқироз шароитида бу маблағни на "Ювентус", на "Барселона" тўлай олади. Катта эҳтимол билан москваликлар футболчи учун талаб қилинаётган миқдорни пасайтиришмас экан, унинг кейинги манзили Европанинг ўртамиёна жамоаларидан бири ёки "Зенит" бўлади.

 Донни ван де Бек

Ҳозирги жамоаси: "Аякс" (Амстердам)

Трансфер нархи ("Transfermarkt" порталига кўра): 44 млн евро

Даъвогарлар: "Реал", "Манчестер Юнайтед"

Нидерландиялик ярим ҳимоячи Европа Чемпионлар Лигасининг ўтган мавсумидаёқ ўзининг нималарга қодирлигини исботлаб қўйганди. Унинг Френки де Йонг, Маттейс де Лигт ва Ҳаким Зиеш сингари сафдошлари гранд клублар таркибини тўлдириб улгуришди. Катта эҳтимол билан ван де Бек ҳам тез орада Амстердамни тарк этади, унга Мадриднинг "Реал"и асосий даъвогар бўлиб турибди. "Қироллик клуби" 23 ёшли хавбек тимсолида Модричнинг давомчисини кўрмоқда. Шунингдек, МЮ ҳам Донни орқали Погбанинг ўрнини тўлдириш вариантидан йироқ эмас.

 Жейдон Санчо

Ҳозирги клуби: "Боруссия" (Дортмунд)

Трансфер нархи ("Transfermarkt" порталига кўра): 117 млн евро

Даъвогарлар: "Манчестер Юнайтед", "Манчестер Сити", "Челси", "Барселона", "Реал"

Санчо Дортмунддан кетиш истагини яширмаяпти — томонлар орасидаги кичик низолар жараённи тобора тезлаштиради. "Боруссия" раҳбарияти ҳам вазиятни тўғри баҳолаяпти ва иқтидорли ижрочини мажбуран олиб қолмоқчи эмас. Клубнинг Роберт Левандовски билан аччиқ тажрибаси шуни кўрсатадики, кетишни истаётган юлдузларни мўмай пулга сотиб юбориш маъқул. 20 ёшли футболчига талабгорлар ҳам етарлича — испан грандлари, "Челси", "Манчестер Сити". Асосий даъвогар эса "Манчестер Юнайтед" ҳисобланади. Англиялик футболчининг ўзи ЕЧЛдаги иштироки таъминланча, "қизил иблислар" сафига ўтишга қарши эмас.

Жалолиддин Машарипов

Ҳозирги клуби: "Пахтакор" (Тошкент)

Трансфер нархи ("Transfermarkt" порталига кўра): 1,4 млн евро

Даъвогар: "Трабзонспор"

Мавсум аввалида "Пахтакор"нинг ОЧЛдаги иштирокидан кейин Машарипов легионерга айланиши ҳақида гапирилганди. Бир неча кун аввал Жалолиддиннинг Туркия Суперлигасига йўл олиши мумкинлиги ҳақида хабар берилди. Катта эҳтимол билан келаси мавсумни ЕЧЛда бошлайдиган "Трабзонспор"нинг ҳамюртимизга қизиқиш билдириши ёқимли, албатта. Кейинроқ футболчининг ўзи ҳали ҳеч қандай аниқ таклиф олмаганини таъкидлади. Осиёнинг турли клубларидан яхшигина таклифларни рад қилиб, Европада тўп тепишни исташини ҳеч қачон инкор қилмаган хоразмлик ярим ҳимоячининг ниятлари тез орада ушалишига тилакдошмиз.

 Элдор Шомуродов

Ҳозирги клуби: "Ростов"

Трансфер нархи ("Transfermarkt" порталига кўра): 5,2 млн евро

Даъвогар: немис, испан, итальян клублари

Сайтимиз орқали эфирга узатилаётган "Тезкор студия" дастурининг 15 майда ўтказилган сонида "Championat.asia" асосчиси Гайрат Хасбиулин Шомуродовга Германия, Испания ва Италия клубларидан аниқ таклифлар борллигини маълум қилганди. Орадан бир кун ўтиб ProSportsManagement компанияси раҳбари Герман Ткаченко бу инсайдни тасдиқлади. Кейинчалик ҳамюртимизга "Шальке-04" ва "Штутгарт" клубларининг жиддий қизиқаётгани очиқланганди. Гарчи РПЛ клубларидан таклифлар бўлса ҳам, Элдорнинг ўзи Европага йўл олишни исташини маълум қилган.

Шунингдек, 18 ёшли Жасур Жалолиддинов ҳам катта эҳтимол билан "Бунёдкор"ни тарк этади. Пандемия туфайли навоийлик футболчининг "Беневенто"га ўтиш эҳтимоли пасайиб кетган бўлса-да, унга Россия чемпионатининг яхши жамоаларидан таклифлар бор. Унинг ўзи "Championat.asia"га Молдова ёки Сербия чемпионатларига ўтмаслигини, иложи борича кучлироқ биринчиликлардан бирига кетишини маълум қилди.

Юқорида номи тилга олинган футболчиларимизнинг кейинги фаолиятига омад тилаймиз. Умид қиламизки, улар ўзларига билдирилган ишончни оқлашади. Зеро, футболчиларимизнинг айни погенциали бундан кўпроғига ҳам қодирлигидан сигнал беряпти.