Тожикистон терма жамоаси ярим ҳимоячиси Алишер Жалилов: "Навбаҳор" жуда яхши трансферни амалга оширди"

Ушбу учрашув олдидан Тожикистон миллий терма жамоаси ярим ҳимоячиси, Душанбенинг “Истиқлол” клуби сардори Алишер Жалиловнинг фикрлари билан қизиқдик.

- Алишер Ўзбекистонга хуш келибсиз. Йўлда қийинчиликлар бўлмадими?
- Раҳмат. Пандемия сабабли авиақатновлар тўхтаган. Шунга қарамай автобусда яхши етиб келдик. Чегарада бизни яхши кутиб олишди ва ниҳоят Тошкентга етиб келдик.

- Бўлажак ўртоқлик учрашуви олдидан фикрларингиз қандай? Терма жамоангиз қандай тайёргарлик кўрди?
- Ўзбекистон терма жамоасида истеъдодли футболчилар кўп. Жамоани яхши ўргандик. Бундай рақибларга қарши ўйнаш ёқимли. Тошкентга яхши ўйин кўрсатиш учун келдик. Умид қиламан-ки, бўлажак учрашувда ғалаба қозонамиз.

- Ўзбекистонда “Истиқлол” клуби футболчиси Эҳсони Пайшанбе Наманганнинг “Навбаҳор” жамоасига трансфер қилингани ҳақида хабарлар тарқалди. Ушбу трансфер ҳақида нима дея оласиз ва собиқ жамоадошингизнинг Ўзбекистондаги имкониятларини қандай баҳолайсиз?
- Эҳсони учун жуда хурсандман. “Навбаҳор” жуда яхши трансферни амалга оширди.  Ёш бўлишига қарамай у жуда истеъдодли футболчи. Навбаҳор таркибини янада кучайтиришга,ғалабаларига ҳиссасини қўшишига умид қиламан. Ўйлайманки, у ҳаммасини уддалайди.

Дилдора Холбаева суҳбатлашди