Тимур Кападзе: "Бугун "Пахтакор" хатога йўл қўймади, айниқса, Қувватов"

"Ўйинга яхши тайёргарлик кўргандик. "Пахтакор" мамлакатимизнинг энг кучли клубларидан бири, менимча, ҳозирда энг кучлиси десак ҳам бўлади. Баҳс курашларга бой, қизиқ ўтди. Стадионга келган мухлислар менимча, зерикиб қолишмади. Бизда ҳам яхши имкониятлар бўлди, қаердадир омадимиз келмади, қаердадир рақиб тажрибаси асқатди. Ғалаба қозонганимизда яхши бўларди, "Пахтакор"ни ярим финалга чиққани билан табриклайман", - дейди Тимур Кападзе.

- Менимча, бугун Қувватов фаолиятидаги энг зўр сейвларни намойиш этди...
- Тўғри, менимча, Абдуманнонов ва Мамасидиқовнинг зарбаларидан кейинги сейвларини кўрдик. Қувватов қандай даражада эканлигини биламиз, терма жамоага номзод посбон. Футбол хатосиз гол бўлмайди, бугун рақиб хато қилмади, айниқса, Қувватов.

- "Олимпик" мавсум давомида яхши ўйин намойиш этмоқда. Агар футболчиларга Суперлига клубларидан таклиф бўлса, уларни қўйиб юборишга тайёрмисиз?
- Энг биринчи вазифам, йигитларни яхши даражага олиб чиқиш ва терма жамоага муносиб футболчи бўлишини таъминлаш. Агар яхши таклифлар бўлса ва ўша клубларда футболчилар ростдан ҳам ўсишига ишонсак, албатта, уларга қаршилик қилмаймиз.