Суперлиганинг 10та ва ПРО лиганинг 4та клуби қарздорликдан қутулмагунча янги шартномаларни рўйхатдан ўтказа олмайди

ПФЛ билан ҳамкорлик қилаётган Ўзбекистон футболчилар уюшмаси "Андижон", "Бухоро", "Нефтчи", "Бунёдкор", "Навбаҳор" ва "Шўртан" клубларининг футболчилар олдида ўз вақтида бажарилмаган мажбуриятлари юзасидан маълумот тақдим этган. Мазкур қарздорликлар бартараф этилмагунга қадар, юқорида номлари келтирилган клублар ҳам янги шартномаларни рўйхатдан ўтказа олмайди. Бу ҳақда championat.asia сайти ишончли манбаларга таяниб хабар берди.

Бундан ташқари, "Андижон", "Нефтчи", "Насаф", "Бухоро", "Қизилқум", "Машъал", "Металлург", "Сўғдиёна", "Навбаҳор", "Бунёдкор", "Сурхон", "Қўқон-1912" ва "Оқ-тепа" футбол клублари легионер футболчиларни рўйхатдан ўтказганлик учун Мусобақалар ўтказиш регламентида белгиланган тўловни ўз вақтида тўлаб бермаган. Шундан келиб чиқиб, мазкур клублар ҳам трансфер ойнасида янги шартномаларни рўйхатдан ўтказа олмайди.

"Машъал", "Металлург", "Сўғдиёна", "Навбаҳор", "Сурхон", "Нефтчи", "Зомин", "Хоразм", "Шўртан", "Истиқлол", "Оқ-тепа" клубларининг қатнашчилик бадали бўйича қисман қарздорликлари мавжуд. "Насаф", "Бухоро" ва "Бунёдкор" футбол клублари эса қатнашчилик бадалини умуман тўламаган. Футболчиларни рўйхатдан ўтказиш жараёнида бу ҳолат инобатга олинади.

ПФЛ футбол клубларининг қатнашчилик бадали бўйича тўловларни босқичма-босқич қисқартириш ва секин аста бу тизимни буткул йўқотишни мақсад қилган. Юқорида номлари келтирилган футбол клублари мавсум аввалида санаб ўтилган тўловларни тўлиқ тўлаб бериш мажбуриятини олган. ПФЛ пандемия шароитидаги қийинчиликлардан келиб чиқиб, барча футбол клубларига осон бўлмаган мавсумни якунлаб олиш имконини берди.