Шуҳрат Мақсудов: “Бунёдкор” учун бундан буён ҳар бир учрашув финал ҳисобланади"

Лекин, айни дамда “Қалдирғоч”лар турнир жадвалининг учинчи поғонаси учун кураш олиб бормоқда. Қизиқарли томони уларда ҳамон имконият мавжуд. Бари футболчиларнинг ўз қўлида. Учта баҳсда уч очко ишлашса бўлгани. Жамоанинг навбатдаги машғулотлари якунинга еткандан сўнг Вадим Абрамовга яқиндан кўмаклашаётган мураббий Шуҳрат Мақсудовдан навбатдаги тур арафасида сайтимиз учун интервью олдик.

- Жамоа олдида масъулиятли вазифа турибди. Шундай экан якшанба куни ўтказиладиган ўйинда сизларни фақат ғалаба қониқтиради. “Навбаҳор” билан ўйинга тайёргарлик жараёни ҳусусида маълумот бериб ўтсангиз...
- Авваламбор ассалому алейкум. Тайёргарлик ҳар доимгидек қизғин кетмоқда. Албатта, ҳаммага маълум танаффусда деярли асосий таркибсиз машғулотларни олиб бордик. Боиси, кўп футболчиларимиз миллий ва олимпия терма жамоаси ихтиёрида эди. Мана ўтган кундан бошлаб жамоамизни негизини ташкил қилувчи футболчилар билан йиғилдик. Олимпиячилар узоқ йўл масофа босиб келганликлари учун уларга дам бердик. Кеча илк бор барча футболчилар иштирокида машғулотларни ўтказишга улгурдик. Буни ҳам ўзига яраша қийинчиликлари бўлади. Сабаби ўйинчилар клубга турли ҳолатларда етиб келишади. Жисмоний ва руҳий ҳолати турлича бўлади. “Навбаҳор” билан ўйинга уларни ҳар томонлама ҳозирлашга алоҳида эътибор қаратяпмиз.

- Бундан келиб чиқиб айтадиган бўлсак жамоа "Навбаҳор"га қарши тўлиқ куч билан ўйнамайди...
- Энди юқорида ҳам айтдим, футболчилар терма жамоалар билан шуғулландилар. Бу-футболчиларнинг қилиб юрган иши. Ватанимиз терма жамоасига жалб этилганлар борасида ҳеч қандай гап сўз бўлиши мумкин эмас. Боллар ҳам вазиятни тушуниб турибди. Улар проффесионал. Учта баҳс қолди. Бундан буён уларнинг ҳар бири биз учун финалдек ўтади. Боллар жиддий қарашмоқда. Наманган жамоасини ҳурмат қиламиз. У ерда олдиндан футболга катта эътибор қаратиб келинган. Ҳозир ҳам, келажакда ҳам водийда футбол ўлмайди деган умиддаман. Бир қанча махоратли футболчилар етишиб чиққан. Умумий қилиб айтганда ички чемпионатимизда кучсиз жамоанинг ўзи йўқ. Гарчи чемпион номи аниқ бўлган бўлсада, қолган ўринлар учун интрига мавжуд. Бу футболимиз ривожланаётганидан далолат.

- Иккинчи даврада жамоага қўшилган янгги футболчилар қай даражада ишончни оқламоқда? Ҳусусан легионерлар Евгений Чумак, Дмитрий Островский...
- Масалан Шоҳруҳ Гадоев ва Санжар Турсуновни аввалдан билар эдик. Хабарингиз бор иккинчи даврага тайёргарликни Минскда олиб бордик. Чумак ва Островскийни уша йиғинда синовдан ўтказдик. Бундай ўйинчиларни кўриб олиш кўпроқ вақт талаб қилади. Афсус, бизда уларни тўлиқ ўрганиш учун фурсат кам бўлди. Ўртоқлик учрашувларидаги ҳаракатларини кўриб жамоамизга қўшиб олгандик.

- “Бунёдкор”нинг сўнгги пайтлардаги муваффақиятсиз натижалари майдон билан боғлиқми? ТТЙМИ стадионида ўта мазмунли ва натижа қайд этилаётганди...
- Гап майдонда демаган бўлардим. Йилдан йилга юртимиздаги майдонлар чими сифатли кўриниш олмоқда. Фақат тўғрисини айтиш керак, Андижондаги майдон жудаям оғир аҳволда эди. У ерда тўп тепиш машаққат. Уй стадионимиздаги майдон ўйиндан ўйинга яхшиланиб боряпти. Бошида кўчиб кетаётган жойлари кузатилди. Ҳозир қониқарли даражада.

Абдулазиз Искандаров суҳбатлашди